कैलारी गाउँपालिकासे जग्गा नापजोख प्रक्रियाके शुभारम्भ

पहुरा समाचारदाता
हसुलिया, २८ भदौ । भुमिहिन दलित÷सुकुम्बासी तथा अव्यवस्थित बसोवासीके व्यवस्थापन कैना कैलालीके कैलारी गाउँपालिकासे जग्गा नापजोख प्रक्रियाके शुभारम्भ करले बा ।

कैलारी गाउँपालिका ओ राष्ट्रिय भुमि आयोग विच हुइल सम्झौता अनुसार भुमिहिन दलित÷सुकुम्बासी तथा अव्यवस्थित बसोवासीके व्यवस्थापन जग्गाके प्रमाणपत्र डेहक लाग वडा–६ भगतपुरसे नापजोखके शुभारम्भ हुइल हो । गाउँपालिका अध्यक्ष राजसमझ चौधरीके वडका पहुनामे हुइल कार्यक्रममे उहाँ रिबन काटके जग्गा नापजोख प्रक्रियाके शुभारम्भ करले रहिट ।
कार्यक्रमममे सम्बोधन करटी उहाँ नाँपजोख करेबेर विवादफे आई सेक्ना हुइल ओरसे उहीहे सहजीकरण करेक लाग गाउँक भल्मन्साहुकनके भारी भुमिका रहल बटैलै । उहाँ कहलै, ‘साँध सीमानामे ढेर विवाद आई सेकी । यहाँके जनप्रतिनिधि,भल्मन्सा, नागरिक समाज, बुद्धिजीवी अपने कार्यक्रम सम्झके समस्या समाधान करके नाँपजोख कार्यक्रमहे आघे बढाई परी ।’
गाउँपालिका अध्यक्ष राजसमझ ओस्टेक करके वडा नम्बर ७, ५, ९ करके सक्कु वडामे नापजोखके काम आघे बहै्रटी लालपुर्जाफे वितरण कैना बटैलै ।

राष्ट्रिय भुमि आयोगके जिल्ला अध्यक्ष यज्ञराज उपाध्याय गाउँपालिका ओ आयोग विच हुइल सम्झौता अनुसार दुसरा चरणमे प्रवेस करटी आजसे नाँपजोखके शुभारम्भ करल बटैलै । बषौैसे भुमिके समस्या रहे, आज कार्यके उदघाटन हुइल बा यी अब समस्याके समाधानओर जैना उहाँ विश्वास व्यक्त करलै ।

अपने जोटल खेत अपने बनाइल घरटहरा हमार नाउँमे नइरहे,’ आयोगके अध्यक्ष कहलै, ‘आव सरकारीसे व्यक्तिगत बनैना हम्रे प्रयासमे बटी । गाउँपालिकाके पहलमे आज यी अवस्थामे आइल हो ।’ कैलालीके १३ पालिका मध्ये पहिल चरणमे पाँच ठो पालिकासंग सम्झौता हुइल ओ यी कार्य गैल वर्षके चैत्रसे यी पालिकामे प्राविधिक खटाके काम हुइटी रहल आयोगके अध्यक्ष उपाध्यक्ष जानकारी करैलै ।

उहाँ कहलै, ‘सीमित प्राविधिकके कारण यी पालिकामे काम करे नइसेकल रहे । क्रमश पोइन्ट राखलपाछे नाँपजोख सुरु हुइल हो । सक्कु जाने यी अपन कार्यक्रम सम्भके सहयोग करे परल ।’
जेकर जमिन हो । जे जोतपोत करले बा ओक्रे नाउँमे राष्ट्रिय भुमि आयोगक नाप्न कार्यविधि बा । उहीहे सहयोग करे पर्ना उहाँ बटैलै । नाँपजोख कैना बेला भुमिहिन दलित, सुकुम्बासीहे पहिल प्राथमिकता धारके काम हुइटी रहल ओ ओकरपाछे अव्यवस्थित बसोवासीहे धारल उहाँ बटैलै ।

भुमिहिन दलित, सुकुम्वासीहे एकचोटी राज्यसे बर्तमान संविधान ओ उहीसे डेहल भुमि उप्परके अधिकार कार्यान्वयन करेक लाग राज्यसे जग्गा उपलब्ध करैना कना नीति रहल आयोगके अध्यक्ष बटैलै ।

कैलारी गाउँपालिका वडा नम्बर ६ के अध्यक्ष प्रेमबहादुर चौधरीके अध्यक्षतामे हुइल कार्यक्रममे गाउँपालिकाके उपाध्यक्ष भगवतीकुमारी चौधरी स्वागत मन्तव्य व्यक्त करल रहिट कलेसे संचालन गाउँपालिकाके सामाजिक विकास अधिकृत यगम कलेल करले रहिट ।

कार्यक्रममे गाउँपालिकाके वडा अध्यक्षहुक्रे, प्रमुख प्रशासकीय अधिकृत विरबहादुर ऐर, कार्यपालिका सदस्य, वडा सदस्य, गाउँपालिकाके टमान शाखाके प्रमुख, आयोगके विज्ञ सदस्य केशवराज जोशी, घनश्याम कुश्मी, पार्वती आग्री, गाउँके भल्मन्सा लगायत गाउँबासीहुकनके उपस्थिति रहे ।