समैजी स्टोरमे राजश्वके छापा

पहुरा समाचारदाता
धनगढी, २९ भदौ । कर छलीके आशंकामे धनगढीके चौराहास्थित समैजी स्टोरमे आन्तरिक राजश्व कार्यालयसे छापा मरले बा ।

एक्के फर्म अन्तरगत टमान कारोबार हुइटी आइल समैजी स्टोरमे आन्तरिक राजश्व कार्यालय धनगढी बुधके छापा मारल हो ।

राजश्व कार्यालय धनगढीके सूचना अधिकारी दुर्गा प्रसाद पौडेल करसम्बन्धी शंकास्पद गतिविधि हुइटी आइल डेखल ओरसे छापा मारके अनुसन्धान कार्य हुइटी रहल जानकारी डेलै । उजुरीके आधारमे अनुसन्धान कार्य हुइटी रहल बटैटी उहाँ हाल स्टोक बुक भिरैना हुइटी रहल जनैलै ।

उ स्टोरसे किराना सामानसंगे और बस्तुके कारोबार हुइटी आइल बा । उहाँ कहलै, ‘एक्के व्यक्तिके नाममे ढेर कारोबार हुइल डेखल बा । किरानासंगे ग्यास, भाँडाबर्टन, ईटा, बिल्डर्सलगायतके कारोबार हुइल कना बाट आइल बा । हम्रे सकारे १० बजेसे स्टोक हेर्ना काममे बटी । २ दिनसम लागी, ओकरपाछे वास्तविकता बाहेर आई ।’