चिकित्सक केसीके मागप्रति सरकार मौन

पहुरा समाचारदाता
धनगढी, २९ भदौ । डाक्टर गोविन्द केसीके २० औँ अनसन धनगढीसे सुरु करले बाटै । धनगढीके एलएन चोकमे रहल लक्ष्मीनारायण मन्दिरके धर्मशालामे अनसनरत चिकित्सा शिक्षा सुधारके अभियान्ता डाक्टर गोविन्द केसीके स्वास्थ्य अवस्था सामान्य रहल बा ।

केसीके सहयोगी अमृत जैसीके अनुसार डा केसीके २०औँ सत्याग्रहके मंगरके डुरसा दिन सक्कु चेकजाँच करेबर स्वास्थ्यमे कुछ कमजोरी आइल बा । डाक्टर केसी अनसन बैठल तीन चार दिन हुइलमे समेत ओहकान मागप्रति सरकार कौनो प्रतिक्रिया डेले नैहो ।

मंगरके सकारे पूर्व प्रधानमन्त्री डाक्टर बाबुराम भट्टराई सार्वजनिक स्वास्थ्य शिक्षा क्षेत्र सुधारके माग रख्टी २०औँचो सत्याग्रह बस्नु सबके लाग लज्जाके विषय रहल बटाइल रहिट । डाक्टर केसी सोम्मारसे २०औँ अनसन सुरु करल विषयबारे मंगरके सामाजिक सञ्जाल ट्वीटरमार्फत उहाँ लिख्ले बाटै,‘सार्वजनिक स्वास्थ्य ओ शिक्षा क्षेत्रके सुधारके विषयहे लेके डाक्टर केसी २०औँचो अनसनमे बैठे पर्ना राज्य ओ हमार सक्कु जनहनके लज्जाके विषय हो ।’

डाक्टर केसीके डुसरा दिन मंगरके अनसनमे सेती प्रादेशिक अस्पतालमे कार्यरत अस्पतालके मेडिकल सुपरिटेण्डेण्ट डाक्टर हेमराज पाण्डे लगायत विशेषज्ञ चिकित्सक भेटघाट कैटी उहाँक अनसनमे समर्थन जनैले बाटै । डाक्टर पाण्डे उहाँहे आवश्यक पर्ना सक्कु उपचारके लाग चिकित्सक तयारी अवस्थामे रहल बटैले बटाइल रहिट ।

डाक्टर केसी स्वास्थ्य सेवामे सुधारके लाग टोकल दरबन्दी अनुसारके क्षमतासे ढिउर बेडमे चल्टी रहल डेशके सक्कु सरकारी अस्पतालके दरबन्दी तत्काल हालके बेड संख्या अनुसार बह्राइ पर्नामे माग रख्ले बाटै ।