बाल दिवस टमान कार्यक्रम कैके मनागिल

एभरेष्ट एकेडेमीसे वक्ततृत्व प्रतियोगिता

पहुरा समाचारदाता
धनगढी, २९ भदौ । ५८औं बाल दिवसके अवसरमे एभरेष्ट एकेडेमी अत्तरिया ‘बालमैत्री समाजके आधारः जिम्मेवार परिवार, उत्तरदायि सरकार’ कना नाराके साथ वक्तृत्व प्रतियोगिता कार्यक्रम कैगिल बा । गोदावरी नगरपालिका कैलाली ओ गोदावरी प्याव्सनके सहकार्यतामे हुइल वक्ततृत्व प्रतियोगितामे गोदावरी नगरपालिका, धनगढी उपमहानगरपालिका, तथा कृष्णपुर नगरपालिकाके १३ विद्यालयके विद्यार्थीहुकनके सहभागिता रहे ।

सहभागी विद्यालयमे धनगढीसे बाल्मिकी इन्टरनेशनल स्कुल, ग्ली एकेडेमी, क्रिष्टल एकेडेमी, स्टेपिङ स्टोन स्कुल, एक्सिस विद्याश्रम, गोदावरी नगरपालिकासे एभरेष्ट एकेडेमी, खप्तड विद्या निकेतन,सैनिक आवसीय महाविद्यालय, जनकल्याण सेकेण्डरी स्कुल, होलिल्याण्ड सेकेण्डरी स्कुल, लोटस आइ सेकेण्डरी स्कुल, जेके सेकेण्डरी स्कुल ओ कृष्णपुर नगरपालिकासे ज्योति ईङलिस बोर्डिङ स्कुल सहभागी हुइल रहिट ।

प्रतियोगितामे खप्तड विद्या निकेतन मालाखेतीके आरती कुवँर प्रथम, एभरेष्ट एकेडेमी अत्तरियाके प्रेन्सी भट्ट, बाल्मिकी इन्टरनेशनल स्कुल धनगढीके सान्भी पाण्डे तृतीय स्थान प्राप्त करले बटै । कलेसे दर्शकहुकनके ध्यानकर्षण कैना विधामे एक्सिस विद्याश्रमके अनन्त कर्ण स्थान सुरक्षित करलै । उत्कृष्ट विद्यार्थीहुकनमे प्रमाणपत्र तथा नगद पुरस्कार प्रदान करल रहे ।

कार्यक्रमके प्रमुख अतिथि गोदावरी नगरपालिकाके उप प्रमुख शारदा देवी रोकाया, विशिष्ट पहुना प्याब्सन केन्द्रीय उपाध्याक्ष जगबीर थापा, सैनिक आवसीय महाविद्यालयके निवर्तमान प्रिन्सिपल अशोक राज खाती, अतिथिमे जनकल्याण सेकेण्डरी स्कुलके प्रिन्सिपल योगेन्द्र हमाल रहल रहिट ।

कार्यक्रमके सभापतित्व एभरेष्ट बाल क्लबके उपाध्यक्ष स्लोक गुप्ता करले रहिट । कार्यक्रम सञ्चालन आशिका पण्डित, रिया जोशी, पुर्णिमा भट्टराई तथा प्रशंसा भट्ट रहल रहिट ।

३० बालिकाहे शैक्षिक सामग्री सहयोग

टीकापुर २९ भदौ । महिला जागरण बहुउद्देश्यीय सहकारी संस्था टीकापुरसे विपन्न ३० बालिकाहे शैक्षिक सामग्री सहयोग करले बा । सहकारीसे टीकापुरके १५ ठो सामुदायिक विद्यालयमे प्राथमिक तहमे अध्ययनरत ३० बालिकाहे शैक्षिक सामग्री वितरण करल हो । बाल दिवसके पूर्व सन्ध्यामे सहकारीसे बालिकाहुकनहे झोला, कापी कलम लगायतके सामग्री वितरण करल हो ।

सामग्री वितरण करटी टीकापुर नगरपालिका शिक्षा शाखाके प्राविधिक सहायक विना पौडेल प्राथमिक तह घरके जगजस्टे रहल ओरसे जग बल्गर बनैना शिक्षक, अभिभावक ओ विद्यार्थीके तालमेल मिले पर्ना बटैलै । ‘बालबालिकाके जग बल्गर बनैना शिक्षकसे केल मेहनत करके नइपुगी, बालबालिकाके पढाइके अवस्थाबारे अभिभावकफे समय डेहे परठ । विद्यालय पठाइलमे जिम्मेवारी पूरा नइहुई’ उहाँ कहलै, ‘बालबालिकाके भविष्य बनैना बेलामे सक्कु जिम्मेवार बने परठ ।’
उहाँ सामुदायिक विद्यालयमे लेखनशैलीसे पठनशैली कमजोर रहल ओरसे शिक्षकसे कक्षा कोठामे पढे लगैना, व्याख्या करके पढैना आवश्यक रहल बटैलै ।

कार्यक्रममे शिक्षिका तथा सहकारीके पूर्व अध्यक्ष ललिता शाही बालबालिकाके आवश्यकता ओ भावनासंग ढेर अभिभावकसे खेलवाड करेबेर बालबालिकाके भविष्य बिग्रन करल ओरसे घरेफे बालमैत्री व्यवहार आवश्यक रहल बटैलै । ‘घरे फे बालमैत्री वातावरण, विद्यालय, समाज सक्कु ओर बालबालिकाके लाग सहज ओ रमाके पढाइमे रुचि जग्ना खालके वातावरण चाहल,’ उहाँ कहलै ।
कार्यक्रममे समाजसेवी रुक्मिणी शर्मा, पत्रकार दुर्गा देवकोटा, शिक्षक ज्ञानु पौडेल, ध्वजबहादुर ओड लगायत बोलल रहिट ।
सहकारीके अध्यक्ष शोभा शर्मा ज्ञवालीके अध्यक्षतामे हुइल कार्यक्रम सहकारीके सचिव कला विष्ट सञ्चालन करल रहिट ।

सचेतना मुलक कार्यक्रम

कञ्चनपुरके बेदकोट नगरपालिकामे बुधके रोज बाल दिवस भब्यताके साथ मनाइल बा । बेदकोट नगरपालिकाके वडा नं.५ धरमपुरस्थित श्री मुक्ति आधारभुत विद्यालयमे बाल दिवस मनाइल हो । मुक्ती आधारभुत विद्यालय व्यवस्थापन समितिके अध्यक्ष कलौटीदेवी चौधरीके संयोजकत्वमे मनाइल बाल दिवसमे वाल अधिकारके बारेमे सचेतना मुलक कार्यक्रम करल रहे । शिक्षा बालबालिकाहुकनके नैसर्गिक अधिकार हो, शिक्षा नै बालबालिकाहुकनके उज्ज्वल भविष्य हो कहिके नियमित रुपमे अपन छावा छाईनहे विद्यालय पठाइक लाग अभिभावकहुकनहे सचेत कराइल मुक्ती आधारभुत विद्यालय धरमपुरके प्रधानाध्यापक धर्मानन्द जोशी बटैलै ।

बाल दिवसके अवसरमे विद्यालयमे नाँचगान सहित सांस्कृतिक कार्यक्रम करल बा । यी विद्यालयमे ३१४ विद्यार्थी रहलमे २०५ जाने मुक्त कमैयाके बालबालिका, ९५ जाने दलित समुदायके बालबालिका रहल बटै ।