हिंसा न्यूनीकरणके लाग समन्वय ओ सहकार्य आवश्यक

पहुरा समाचारदाता
धनगढी, ३० भदौ । समाजमे बढटी गैल हिंसा न्यूनीकरणके लाग सरोकारवाला निकाय बीच समन्वय ओ सहकार्य आवश्यक रहल एक कार्यक्रमके सहभागिहुक्रे बटैले बटै ।

मानव अधिकारका लागि महिला एकल महिला समूह ओ ओरेक नेपालसे विफेक रोज धनगढीमे संयुक्त रुपमे आयोजित ‘लैङिक हिंसाके क्षेत्रमे काम कैना सेवा प्रदायक निकायसंगके संवाद’ कार्यक्रम महिला तथा बालबालिकाहुकनके क्षेत्रमे काम कैना टमान सरकारी तथा गैर सरकारी संघ संस्था हुइलेसेफे समन्वय ओ सहकार्य नइहुइल सहभागिहुकनके कहाई रहल रहे ।

कार्यक्रममे जिल्ला प्रहरी कार्यालय कैलालीके प्रहरी नायव उपरीक्षक वेद प्रकास जोशी प्रहरीमे एक वर्षमे ४ सय ७० मुद्दा दर्ता हुइलमे ३ सय ४९ मुद्दा मिलापत्रसे टुङगाइल बटैलै । उहाँ समाजमे हुइना ंिहंसा न्यूनीकरणके समन्वय सहकार्य विना ऐक्केली कम करे नइसेक्ना बटैलै ।

ओस्टेक कार्यक्रमके वडका पहुना रहल धनगढी उपमहानगरपालिके उप मेयर कन्दकला राना सूचनासे महिला हिंसाके घटनामे ढेर हदसम कम हुइल बटैली । ‘कुछफे हुइल नइहो कना नइहो, उहाँ कहली, ‘पहिलसे अब्बे ढेर सुधार हुइल बा ।’ सक्कु जे अपन क्षेत्राधिकारभिटर रहिके काम करलेसे सुधार हुइना उहाँक धारणा रहल बा । उहाँ काम करेबेर समन्वय ओ सहकार्य करके आघे बह्रना आवश्यक रहल बटैली ।

कार्यक्रममे कैलालीके प्रमुख जिल्ला अधिकारी किरण थापा समाजमे टमान समुदायसे संस्कारहे अनुसरण करे सेक्लेसेफे महिला हिंसाके घट्नामे कमी अइना दावी करलै । उहाँफे काम करेबेर समन्वय ओ सहकार्यमे जोड डेलै ।

समाजमे हुइना अप्ठ्यारा मुद्दाहे मेलमिलाप कराईबेर समस्या हुइना कैलारी गाउँपालिका अध्यक्ष राजसमझ चौधरी बटैलै । ‘समाजमे हुइना अप्ठ्यारा घट्नाहे कौनोफे हालतमे मेलमिलाप कराई नइपरठ,’उहाँ कहलै, ‘यदि मेलमिलाप करलेसे फेरसे समस्या आइठ ।’ स्थानीय तह लग्गेक सरकार हुइल ओरसे हिंसामे परलहुकनके अभिभावकके जिम्मेवारी अपने लेना अध्यक्ष चौधरी बटैलै । उहाँ फे समन्वय ओ सहकार्यमे जोर डेलै ।

कार्यक्रममे राष्ट्रिय मानव अधिकार आयोग सुदूरपश्चिम प्रदेश संयोजक मोहनदेव जोशी गरिबीकेफे हिंसा बह्रल कारण महिलाहुकनके आर्थिक निर्भरताओर लैजैना जरुरी रहल बटैलै ।

कार्यक्रममे महिला अधिकारकर्मी गोमा आचार्यले अपन धारणा व्यक्त करटी महिला तथा बालबालिकाहुकनके क्षेत्रमे काम कैना सरकारी तथा गैर सरकारी संघ संस्थाविच समन्वय ओ सहकार्य नइहुइल कारण बहुट बाट विग्रल बटैली । उहाँ सक्कु केश प्रहरी समक्ष पुग्न वातावरण बनाई पर्ना बटैली ।

ओस्टेक करके भगवती हमाल सक्कु निकाय एकजुट हुइलेसे केल महिला हिंसा कम करे सेक्ना बटैली । मानव अधिकारका लागि महिला एकल महिला समूह सुदूरपश्चिम प्रदेश संयोजक सुमन शर्माके अध्यक्षतामे हुइल कार्यक्रमके संचालन ओरेक नेपाल कैलालीके जिल्ला संयोजक विनु राना करले रहिट ।