अपने गोसियासे असुरक्षित बटैं महिला
पहुरा समाचारदाता
धनगढी, ३० भदौ । महिला पुनर्स्थापना केन्द्र (ओरेक) नेपाल कैलाली विफेक रोज ६ महिनामे अभिलेखीकरण हुइल घटना सार्वजनिक करल ।
ओरेक नेपालसे विफेक रोज धनगढीमे आयोजित पत्रकार सम्मेलनमे जनवरी २०२२ से जुनसम अभिलेखीकरण हुइल घटना सार्वजनिक करटी ३५ जाने हिंसा पीडितहुकनके घटना दर्ता हुइल जनैले बा ।
उ घटनामे पीडकके प्रकार हेरेबेर २४ जाने महिला अपने गोसियासे पीडित हुइल ओरेक कैलालीके जिल्ला संयोजक विनु राना बटैली । ओस्टेक करके छिमेकीसे ६ जाने, प्रेमीसे १ जाने, सेवा प्रदायकसे ३ जाने ओ अपरिचित व्यक्तिसे १ जाने पीडित हुइल उहाँ जनैली ।
हिंसा पीडितहुकनके उमेरहे हेरेबेर सबसे २० से २९ बरसके १६ जाने, १० से १९ बरसके ७ जाने, ३० से ३९ बरसके ६ जाने, ४० से ४९ बरससमके ४ जाने, ५० से ५९ बरससमके १ ओ ६० से ६९ बरससमके १ जाने रहल जनागिल बा ।
महिला पुनर्स्थापना केन्द्रमे घटना रेफर प्रहरीसे ४, ओसिएमसीसे ७, पालिकासे १, विल्डनसे १, व्यक्तिगत मार्फत १ ओ सबसे ढेर पीडित अपनही २१ जाने आइल संयोजक बटैली ।
जातिजत आधारमे प्रभावितहुकनके विवरण हेरेबेर सबसे ढेर ब्राम्हण/क्षेत्रीके १७ जाने, जनजातीके ८ जाने ओ १० जाने रहल बटै ।
ओस्टेक सुरक्षा आवास गृहमे आइलबाहेकफे जम्मा ८५ ठो घटना दर्ता हुइल ओरेक कैलालीके जिल्ला संयोजक राना बटैली । हिंसा प्रभावितहुकनसंग सुरक्षा आवास गृहमे १५ जाने ओइनके बालबालिकाफे आश्रित रहल उहाँ जनैली जनागिल बा ।
नेपाल पत्रकार महासंघ कैलालीके अध्यक्ष हिमालय जोशीके अध्यक्षतामे हुइल कार्यक्रममे महिला अधिकारकर्मी गोमा आचार्य महिला हिंसाके घटनामे वृद्धि हुइलसंगे संघ संस्थामे सचेत हुइल बटैली ।
