शिक्षा क्षेत्रमे ढेर सुधार कैना बाः गापा अध्यक्ष

पहुरा समाचारदाता
हसुलिया, ३१ भदौ । कैलारी गाउँपालिका–४ भित्तरीयामे रहल कालिकामाई आधारभुत विद्यालयके साधारणसभा तथा अभिभावक भेला शुकके रोज सम्पन्न हुइल बा ।

गाउँपालिका अध्यक्ष राजसमझ चौधरीके वडका पहुनामे हुइल कार्यक्रममे उहाँ विद्यालय ओ शिक्षा क्षेत्रमे बहुट चिज सुधार करे पर्ना बटैले बटै । गाउँपालिकासे विद्यालय अनुगमन समिति बनाके अनुगमन करटी रहल ओरसे विद्यालयमे आवश्यक पर्ना शिक्षक, भवनके लाग आघे बह्रना उहाँ बटैलै । ढेर विद्यालयमे स्थानीय भाषा शिक्षक नइरहल, बाल विकासके समस्या रहलफे उहाँ जनैलै । शिक्षा संगे कृषि क्षेत्रमे ढेर महत्व डेहल कहटी कृषि मिटरके लाग विद्युतीकरणके लाग पहल हुइटी रहल अध्यक्ष बटैलै ।

कार्यक्रममे विशिष्ट नेपाली काँग्रेस कैलारीके सभापति कृष्ण प्रसाद चौधरी अभिभावकहुकनहे अपन बालबालिका ओर ध्यान डेना आग्रह करलै । उहाँ कहलै, ‘बोडिङमे पह्रना लर्कनहे ढेर ध्यान डेना मने सरकारी विद्यालयमे पह्रना लकैनमे ध्यान नइडेहल डेखल बा ।’

कार्यक्रममे विद्यालय व्यवस्थापन समितिके सदस्य रामनाथ चौधरी, वडा सदस्य हरिद्वारी चौधरी, भल्मन्सा सन्तराम चौधरी, विद्यालयके प्रअ दसीराम चौधरी, शिक्षक अभिभावक संघके अध्यक्ष बासुराम चौधरीलगायत मन्तव्य व्यक्त करल रहिट ।
विद्यालय व्यवस्थापन समितिके अध्यक्ष भीखराम चौधरीके अध्यक्षतामे हुइल कार्यक्रममे स्वागत शिक्षिका मायारानी चौधरी ओ संचालन टेकेन्द्र परियार करले रहिट । कार्यक्रममे विद्यालयके आर्थिक बर्ष २०७८÷०७९ सालके २ लाख ३३ हजार २४ रुप्या बराबरके आय व्यय प्रस्तुत कैगिल बा ।