मृत्यु हुउइयाके संख्या १७ पुगल
पहुरा समाचारदाता
अछाम, १ कुँवार । अछामके तीनठो पालिकामे पहिरोमे परके मृत्यु हुउइयाके संख्या १७ पुगल बा । कमलबजार नगरपालिका, तुर्माखाँद ओ ढकारी गाउँपालिकामे पहिरोसे घर भँठके हालसम १७ जनहनके शव निकारल निमित्त प्रमुख जिल्ला अधिकारी दिपेश रिजाल जानकारी डेलै ।
ओहकान अनुसार कमलबजार ८ मे अक्के परिवारके ५ जनहनके शव निकारल बा कलेसे कमलबजार ६ ठाँटीकाँधमे बेपत्ता हुइल तिन जनहनके शव फेला परल बा । ठाँटीकाँधमे इहीसे आघे निकारल ४ जाने सहित ७ जनहनके मृत्यु हुइल बा ।
ओस्टके, तुर्माखाँद ५ मे दुई घर भँठके ४ जनहनके शव फेला परल बा अन्य ५ जाने बेपत्ताके खोजी हुइटी रहल प्रहरी जनैले बा । ओस्टके ढकारी गाउँपालिका ६ मे पहिरोसे भँठके १ जनहनके मृत्यु हुइल बा कलेसे औरे एकजाने बेपत्ता रहल रिजाल बटैलै ।
तिनु पालिकामे ६ जाने आभिन बेपत्ता रहल बाटै कलेसे ११ जाने घाहिल हुइल बाटै । मृतकहुक्रनके सनाखत कार्य जारी रहल प्रहरी नायव उपरीक्षक नारायण डाँगी बटैलै । ओहकान अनुसार बेपत्ताहुक्रनके खोजी कार्य तीव्र पारल बा ।
