कैलारीके दुई वडा डुबानमे उद्धार कार्य जारी (फोटो फिचर)

पहुरा समाचारदाता
हसुलिया, १ कुवाँर । विफेक रोजसे बरसल अविरल बर्षाके कारण कैलालीके कैलारी गाउँपालिका वडा नम्बर ५ ओ ७ पूर्ण रुपमे डुबानमे हुइल बा । वडा नम्बर ५ के मनकापुर, बैसपुर, ओ वडा नम्बर ७ के छोटकी बसन्ता, बरका बसन्ता, फुइयाफाँटा, रामपुर, तिघरी, नारायणपुर, मोहनपुर डुबानमे परल इलाका प्रहरी कार्यालय हसुलियाके प्रमुख रामसिंह बोहरा बटैलै ।

बाढके कारण सबसे प्रभावित क्षेत्र वडा नम्बर ५ के मनकापुर, बैसपुर, मगरागाढी रहल बा । बाढमे फसल मनैनके उद्धार करटी कार्य करके सुरक्षित ठाउँमे लैजैना कार्य जारी रहल कैलारी गाउँपालिकाके अध्यक्ष राजसमझ चौधरी बटैलै । यी ठाउँसे ४० जनहनहे उद्धार करल बा । घरेम पानी पैठल कारण विहानेसे भुखे रहलहुकनहे राहातके व्यवस्था करल उहाँ बटैलै ।

ओस्टेक वडा नम्बर ७ के टमान गाउँ डुबानमे परल ओरसे जोखिममे रहल घरसे उद्धारके काम हुइटी रहल वडा नम्बर ७ अध्यक्ष दिपेन्द्र बम बटैलै । कटैनी लडियक पानी वडा नम्बर ५ ओ ७ के ढेर घर प्रभावित हुइल कारण गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरी, वडा नम्बर ५ के अध्यक्ष विष्णु प्रसाद चौधरी, वडा सदस्य, इलाका प्रहरी कार्यालय, शसस्त्र प्रहरीसे उद्धार कार्य जारी रख्ले बा ।

ओस्टेक करके जिल्ला प्रशासन कार्यालय कैलालीके अनुसार कैलारीमे १८० घरधुरी, जोशीपुरमे ४ सय घुरधुरी, टीकापुरमे १७५ प्रभावित हुइल बा कलेसे ७० घर विस्थापित हुइल बा । ओस्टेक रुखुवा गिरके टिकापुर–१ एक ठो छेगररीया मुवल बा । चुरेमे एक परिवार विस्थापित हुइल बा । पहिरो गिरके आठ बरषके एक बालक आयूष सापकोटा घाहिल हुइल बटै ।

ओस्टेक जानकीमे ८५ घर, घनगढीमे १५ घरधुरी प्रभावित हुइल बा । कलेसे मच्छी मर्ना क्रममे एक लउण्डी नविना चौधरी पुहके वेपत्ता हुइल बटी ।

ओस्टेक लम्की चुहामे पानी पैठके १५० घरधुरी प्रभावित हुइल बा । यहाँ एक ठो सुरा ओ २५० ठो मुरगी मुवल जिल्ला प्रशासन कार्यालय कैलालीके प्रशासकीय अधिकृत शिवराज जोशी बटैलै ।