कैलारीमे चट्याङसे मृत्यु हुइल परिवारहे ४ लाख ६९ हजार हस्तान्तरण

पहुरा समाचारदाता
धनगढी, १ कुवाँर । किसान बहुउद्देश्यीय सहकारी संस्थासे यिहे गैल असार १४ गते चट्याङ लागके मृत्यु हुइल कैलारीके चट्याङ पीडित परिवारहे ४ लाख ६९ हजार डेले बा ।

उ सहकारीके शेयर सदस्यसमेट रहल चट्याङ लागके मृत्यु हुइल कैलारी गाउँपालिका वडा नम्बर १ रानामुरा गाउँ बैठना ५६ वर्षीय सुखपंखीदेवी चौधरीके लोन लेहल रहिट । सहकारीसे लोन लेहेबेर विमाफे हुइनाओरसे लोन अवधिमे उहाँक मृत्यु हुइलपाछे सुविधा हस्तान्तरण करल किसान बहुउद्देश्यीय सहकारी संस्था हसुलियाके प्रमुख डम्मरराज जोशी बटैलै ।
सहकारीसे शुकके रोज श्रद्धान्जली सभा तथा सुविधा वितरण कार्यक्रमके चट्याङसे मृत्यु हुइल परिवारहे ४ लाख ६९ हजार हस्तान्तरण करल रहे ।

कार्यक्रमके वडका पहुना कैलारी गाउँपालिकाके अध्यक्ष राजसमझ चौधरी मृतकके गोसिया परनुराम डगौंराहे चेक हस्तान्तरण करल रहिट कार्यक्रममे बोल्टी उहाँ कैलारी गाउँपालिकासे आपतविपतमे परल व्यक्तिहुकन सहयोग कैना तयार रहल बटैलै । कैलारी–७ विपतपुरमे मुक्तकमैया बस्तीमे आगी लाग पूर्णरुपमे क्षति हुइल २७ घर निर्माणके प्रक्रिया आघे बह्राइल बटैलै ।
ओस्टेक उहाँ अपने पहलमे ‘विपद पीडित उद्दार ओ राहत सम्बन्धि मापदण्ड २०७७’ बमोजिम मृतकके गोसियाहे असार २४ गते जिल्ला प्रशासन कार्यालय कैलालीसे २ लाख रुप्या राहत डेहुवाइल बटैलै ।

सहकारीके सदस्य पतिराम चौधरीके अध्यक्षतामे हुइल कार्यक्रममे कैलारी गाउँपालिकाके योजना अधिकृत सन्तोषकुमार चौधरी, इलाका प्रहरी कार्यालय हसुलियाके प्रमुख रामसिंह बोहरा लगायतके उपस्थिति रहे ।

असार १४ गते चट्याङ लागके ओहे गाउँक ३४ वर्षके धनीराम चौधरी ओ ३२ वर्षके कृष्ण चौधरी घाहिल हुइल रहैं ।