जनताके साथमे काँग्रेस कैलारीमे हुइल

पहुरा समाचारदाता
हसुलिया, १ कुवाँर । जनताके सामे काँग्रेस ओ स्थानीय निर्वाचनके समिक्षा कार्यक्रम कैलारी गाउँपालिकाके हसुलियामे हुइल बा ।

नेपाली काँग्रेस कैलारी गाउँपालिका कार्यसमितिके आयोजनामे हुइल कार्यक्रममे वडका वडका पहुना नेपाली काँग्रेसके प्रदेश सदस्य तथा कैलारी गाउँपालिकाके अध्यक्ष राजसमझ चौधरी रहल रहिट । ओस्टेक विशिष्ट पहुनामे नेपाली काँग्रेसके जिल्ला उपसभापति खेमराज डगौरा, गाउँपालिका उपाध्यक्ष भगवतीकुमारी चौधरी रहल रहिट ।

जनताके साथमे काँग्रेस ओ स्थानीय निर्वाचनके समिक्षा कार्यक्रममे वडका पहुना राजसमझ चौधरी स्थानीय तह चुनाव पार्टीके सक्कु कार्यकर्ताके डेना ओ कैलारीबासीके साथसे नेपाली काँग्रेसके एकल जित सुनिश्चित हुइल बटैलै । स्थानीय तह निर्वाचन जिटलपाछे चुनावी घोषणापत्र अनुसार कार्य आघे बह्रना प्रयासमे रहल ओ सक्कु जानेक सल्लाहके साथ आवश्यक रहल उहाँ बटैलै । १०० दिनके उपलब्धी भर्खर सार्वजनिक हुइल ओ ओम्ने कैलारीबासीके हितमे ढेर काम हुइल अध्यक्ष बटैलै । ओस्टेक करके प्रदेश ओ संघके निर्वाचनफे लग्गे अइटी रहल ओरसे कैलारी गाउँपालिकाके विकासके लाग यी क्षेत्रसे नेपाली काँग्रेसके प्रतिनिधिहुकन विजय करैना जरुरी रहल बटैलै ।

कार्यक्रममे विशिष्ट पहुना नेपाली काँग्रेसके जिल्ला उपसभापति खेमराज डगौरा स्थानीय चुनाव जस्टे संघ ओ प्रदेशके चुनावमे जनताके साथ आवश्यक रहल बटैलै । विशिष्ट पहुना गाउँपालिका उपाध्यक्ष भगवतीकुमारी चौधरी अपनेहुक्रे विजय कलेक पार्टीके विजय ओ कैलारीबासीके विजय रहल कहटी सक्कु जाने साथ ओ सल्लाह अनुसार आघे बटैली ।

कार्यक्रममे महासमिति सदस्य रामचरण चौधरी, पुरन चौधरी, भरतराम चौधरी, नेपाल शिक्षक संघ कैलारीके अध्यक्ष मदन प्रसाद पौडेल संघ ओ प्रदेशके चुनावके लाग सहकार्य समन्वय करटी आघे बह्रे पर्ना जरुरी रहल बटैलै । कार्यक्रममे पार्टीके नेता परसराम चौधरी, मनिराम चौधरी, वडा–७ के सभापति बालकिसन चौधरी, नेपाली काँग्रेस कैलारीके सचिव मिना चौधरी, वडा नम्बरके प्रेम बहादुर चौधरी, वडा–३ के सभापति तथा वडा अध्यक्ष सन्तराम चौधरी, वडा नम्बर ५ सभापति रामप्रसाद चौधरी, सिएफसिसिके अध्यक्ष तथा नेपाली काँग्रेसके यूवा नेता रमेश चौधरी, वडा–१ के सभापति भागीराम चौधरी, केदार चौधरी, नविन बोहरा लगायत अपन बाट राखल रहिट ।

कार्यक्रम नेपाली काँग्रेस कैलारी गाउँपालिका कार्यसमितिके सभापति कृष्ण प्रसाद चौधरीके अध्यक्षतामे हुइल रहे । कलेसे संचालन सचिव मिना चौधरी ओ स्वागत उपसभापति सोनुराम चौधरी करले रहिट । उहे अवसरमे पार्टीमे ढेर नम्मा समयसे योगदान डेहल बायोबृद्ध अङगानु चौधरी ओ सोनुराम चौधरीहे दोसल्ला ओ प्रमाणपत्रसहिट सम्मान कैगिल बा ।