बाढपहिरोसे तीन महिनामे ४२ जनहनके मृत्यु
पहुरा समाचारदाता
धनगढी, २ कुँवार । सुदूरपश्चिम प्रदेशमे मनसुन सक्रिय हुइल तीन महिनामे विपद्के कारणसे ४२ जनहनके मृत्यु हुइल बा ।
मनसुन सक्रिय हुइल यहोर विपदजन्य (बाढ, पहिरो तथा डुवान) मे परके ४२ जनहनके मृत्यु हुइल ओ ११ जाने बेपत्ता हुइल सुदूरपश्चिम प्रदेश आपत्तकालीन कार्य सञ्चालन केन्द्रके तथ्यांकमे उल्लेख रहल बा ।
सामान्यतः नेपालमे मनसुन जुन १३ मे सक्रिय होके सेप्टेम्बर २३ मे निस्क्रिय हुइठ् । मनसुन सक्रिय हुइल यहोर प्रदेशके नौ जिल्लामध्ये बाढ, पहिरो तथा डुवानके कारण कैलाली, कञ्चनपुर, अछाम ओ दार्चुला जिल्ला ढिउर प्रभावित हुइल बावै ।
उक्त अवधिमे सबसे ढिउर मानवीय क्षति अछाममे हुइल बा कलेसे कैलालीमे ढिउर परिवार प्रभावित बनल बाटै ।
बिफेक रातसे परल अविरल वर्षाके कारण बाढ तथा पहिरोमे परके अछाममे २२ ओ कैलालीमे दुई सहित २४ जनहनके मृत्यु हुइल बा । इ सँगे शनिच्चरसम प्रदेशमे विपद्के टमान ५० ठाउँमे मृत्यु हुउइयाके संख्या ४२ पुगल बा ।
प्रदेशमे बर्सेनि विपद्से भौतिक तथा मानवीय क्षति हुइना क्रम बह्रल बा । प्रदेशके तराई क्षेत्रमे बाढ तथा डुबान ओ पहाडी क्षेत्रमे पहिरो तथा प्रदेशके नौ जिल्लामे चट्याङ, हावाहुरी, आगलागीलगायतके विपद् ओ वन्यजन्तु आक्रमणसे फेन अन्न बाली तथा मानवीय क्षति हुइटी आइल बा ।
प्रदेश आपत्तकालीन कार्यसञ्चालन केन्द्रके तथ्यांकअनुसार मनसुन सुरु हुइल यहोर शुकसम प्रदेशके ४७ ठाउँमे बाढीपहिरो ओ डुबानसे १८ जनहनके मृत्यु हुइल रहे । कलेसे २६ जाने घाहिल हुइल रहिट । ४७ स्थानमे एक सय चार घरपरिवार प्रभावित हुइल केन्द्रके तथ्यांकमे उल्लेख रहल बा ।
दार्चुलामे पहिरो तथा बाढमे परके ६ जनहनके मृत्यु हुइल बा कलेसे १० जाने बेपत्ता हुइल बाटै । तीन महिनामे विपद्के टमान घटनामे दार्चुलामे १२ जाने घाहिल हुइल बाटै ।
ओस्टके विपदजन्य घटनासे मानविय क्षति हुइल जिल्लामध्ये कञ्चनपुर टिसरामे रहल बा । कञ्चनपुरमे विपदका कारण चार जनहनके मृत्यु ओ दुई जाने घाहिल हुइल प्रदेश आपत्तकालीन कार्यसञ्चालन केन्द्रके तथ्यांकमे उल्लेख रहल बा ।
आर्थिक बरस २०७८÷७९ मे प्रदेशमे १ सय १३ विपदजन्य घटनामे परके ५० जनहनके मृत्यु, २३ जाने बेपत्ता ओ ५३ जाने घाहिल हुइल रहिट । उ आर्थिक बरसमे सबसे ढिउर मानविय घटना डोटीमे हुइल रहे । डोटीमे पहिरोमे परके १८ जनहनके मृत्यु हुइल रहे ।
कैलालीमे दुईके मृत्यु, दुई घाहिल
कैलालीके धनगढीमे झलारी नालीमे पुहके शनिच्चरके एक युवतीके मृत्यु हुइल रहे । बिफेक रातसे परल अविरल वर्षाके कारण नालीमे पुहके १९ वर्षीय नविना चौधरीके मृत्यु हुइल कैलालीके प्रहरी नायव उपरीक्षक वेदप्रकाश जोशी जानकारी डेलै ।
मृतक युवती धनगढी उपमहानगरपालिका वडा नम्बर–१३ के हुइटी । उहाँ मच्छी मर्ना क्रममे नालामे पुहके बेपत्ता हुइल रही । प्रहरी खोजी कार्य कैटी गैलमे उहाँहे मृत अवस्थामे फेला पारल हो ।
ओस्टके भजनी नगरपालिका–८ गोरचौराके ५५ वर्षीय कालुराम चौधरी फेन बाढमे पुहके ज्यान गैल बा ।
टीकापुर नगरपालिका वडा नं. २ मे घर भत्केबर २२ वर्षीय युवक सुशील चौधरी घाहिल हुइल बाटै । चौधरीहे थप उपचारके लाग नेपालगन्ज लैगिल बा ।
ओस्टके चुरे गाउँपालिका वडा नम्बर ३ मे पहिरो गिरके घरमे रहल आठ वर्षीय आयुश सापकोटा घाहिल हुइल बाटै ।
जिल्ला प्रशासन कार्यालय कैलालीके सूचना अधिकारी शिवराज जोशीके अनुसार कैलालीके पूर्वी क्षेत्रके पाँच पालिकामे डुबानके कारण कैयौं परिवार विस्थापित हुइल बाटै ।
अछाममे २२ के मृत्यु, एक बेपत्ता
अछाममे शुकसे हुइल अविरल वर्षासँगे आइल बाढ तथा पहिरोमे मृत्यु हुउइयाके संख्या २२ पुगल बा । जिल्लाके कमलबजार नगरपालिका, तुर्माखाद गाउँपालिका ओ ढकारी गाउँपालिकामे पहिरोमे भँठके २२ जनहनके शव फेला परल सहायक प्रमुख जिल्ला अधिकारी दिपेश रिजाल जानकारी डेलै ।
२२ जनहनके शव भेटाइबर एक जाने आभिन बेपत्ता रहल जिल्ला प्रहरी कार्यालय अछाम जानकारी डेले बा । पहिरोमे परके ११ जाने घाहिल हुइल बाटै । पहिरोमे परके घाहिल हुइल ढकारी गाउँपालिका–६ ढुंगाचाल्नाके ३ जाने घाहिल हुइलहुक्रनहे हेलिकप्टरमार्फत् उद्धार कैके सुर्खेत लैगिल बा ।
