पोषण कार्यक्रमके सिकाई अदानप्रदान

पहुरा समाचारदाता
हसुलिया, २ कुवाँर । कैलालीके कैलारी गाउँपालिकामे एकीकृत पोषण कार्यक्रमके दिगोपना एवं सिकाई अदान प्रसान कार्यशाला हुइल बा ।

गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे उहाँ भौतिक विकाससे सामाजिक क्षेत्रके विकास कैना जरुरी रहल बटैली । स्वास्थ्य क्षेत्रमे आठ बर्ष करल अनुभव सुनैटी उहाँ गाउँपालिकामे पोषण सम्बन्धी कार्यक्रम तदारुकताके साथ लागु कैना प्रतिबद्धता जनैली ।

महिला तथा बालबालिका शाखामे स्रोतके अभावसे बजेट कम छुइल बा,’ उपाध्यक्ष कहली, ‘काठमाण्डौमे डेलीगेसनमे जाईबेर महिला तथा बालिकाके क्षेत्रके माग राखल बा । कैलारी गाउँपालिकामे महिलाके पाठेघर खस्ना ढेर समस्या बा ।’
महिला तथा बालबालिकाके क्षेत्रमे पहल जारी रहलफे उहाँ बटैली । पोषण कार्यक्रम मजा रहल कहटी उहाँ संस्थासे समन्वय करटी आघे बह्रैनाफे उहाँ बटैली ।

कार्यक्रममे वडा–६ के अध्यक्ष प्रेमबहादुर चौधरी, महिला स्वम सेविका पार्वती चौधरी सुआहारासे संचालन करल एकीकृत पोषण कार्यक्रमसे यहाँके कुपोषण न्यूनिकरणमे टेवा पुगल जनैलै ।

कार्यक्रममे सुआहाराके कृषि कार्यक्रम संयोजक कुल प्रसाद सुवेदी डुबलैना केल नाही आवश्यकतासे ढेर मोटैनाफे कुपोषणके लक्षण रहल बटैलै । सीमान्तकृत समुदायमे डुबैना समस्या बा कलेसे सम्पन्न परिवारमे आवश्यकतासे ढेर मोटैना समस्या रहल उहाँ बटैलै । विश्वभर ३३ प्रतिशतमे कुपोषण रहल उहाँ जनैलै ।

कैलारी गाउँपालिकामे पोषणके अवस्थाबारे जानकारी डेटी स्वास्थ्य शाखाके प्रमुख विरेन्द्र सापकोटा बालबालिकाहुकनके स्क्रेनिङ हुइटी रहल बटैली । आर्थिक बर्ष २०७८÷०७९ सालमे १२ जाने लर्कनमे कुपोषण डेखल बटैलै । ओस्टेक उहिसे आघे आर्थिक बर्षमे १७ ओ १५ जाने लर्कनमे कुपोषण डेखल उहाँ जनैलै ।

कार्यक्रममे सुआहाराके स्वास्थ्य पोषण अधिकृत नरबहादुर विक संस्थासे करटी गतिविधिबारे जानकारी कराइल रहिट । सुआहारा–२ ओराइल लागल मने सुआहारा–३ लागु हुइना उहाँ जनैलै । सुआहारासँगे कोभिडके क्षेत्रमे काम करल उहाँ जनैलै ।
कार्यक्रम कैलारी गाउँपालिकाके समन्वयमे सुआहारा, फाया नेपालके आयोजना तथा यूएसएडके आर्थिक सहयोग हुइल रहे । कार्यक्रमके संचालन कैलारी गाउँपालिकाके स्वास्थ्य शाखाके नरेश चौधरी कैले रहिट । कार्यक्रममे जनप्रतिनिधि, टमान शाखाके प्रमुख, महिला स्वास्थ्य स्वयं सेविकाहुकनके सहभागिता रहे ।