दुई स्रष्टा सम्मानित

पहुरा समाचारदाता
धनगढी, ३ कुवाँर । संविधान दिवसके अवसरमे लुम्बिनी प्रदेश सरकारसे टमान क्षेत्रमे विशिष्ट योगदान पुगैना प्रदेशके व्यक्तित्वहे टमान पदकसे विभूषित कैना करले बा । यिहे क्रममे साहित्यकार डा कृष्णराज सर्वहारीहे प्रदेश रत्न पदक (प्रथम) से विभूषित कैना घोषणा करल बा ।

थारू भाषा, साहित्यके उन्नयन, थारू शब्दकोश संकलन, थारू पाठ्यक्रम निर्माण एवम् थारू साहित्यके खोज अनुसन्धानमार्फत् सहयोग पुगाइल कहटी सर्वहारीहे प्रदेश रत्न पदक डेहल बा ।

फुटल करम उपन्यास, दोसर घर जाइबेर मुक्तक, समयका उच्छवासहरु हाइकु, मामा भान्जा लोककथा, सुख्ली बालकथा, कमैया बस्तीमे भगन्वा लघुकथा, जोन्हु मामा बालकविता, ढोंढोंपोंपों हाँस्यव्यंग्य, भारतमे थारुन्के खोजी यात्रासंस्मरण लगायत टमान विधामे सर्वहारीके थारू भाषामे पहिल पुस्तकाकार कृति प्रकाशित हुइल रेकर्ड बा । हालसम उहाँक थारू, नेपाली तथा अंग्रेजी भाषामे करके ३२ कृति प्रकाशित बटै ।

लुम्बिनी प्रदेश सरकारसे सोम्मार बुटवलमे आयोजित संविधान दिवस २०७९ कार्यक्रममे विभूषित हुइलहुकनके नामावली घोषणा करल हो । लुम्बिनी प्रदेशके आन्तरिक मामिला, कानुन तथा सञ्चारमन्त्री तिलकराम शर्माके अनुसार संघीयता ओ गणतन्त्रके स्थापनामे सहयोग पुगाइल कहटी प्रदेशके ६१ जनहनमे विभूषित कैना निर्णय करल हो ।

ओस्टेक करके आख्यानकार÷साहित्यकार शेखर दहित कर्मयोगी बद्री विक्रम पूर्णिमा युवा प्रतिभा पुरस्कार–२०७९ से सम्मानित हुइल बटै । उहाँफे गर्यावा बुदु, ठाह्रा लगायत ढेर कृति प्रकाशित हुसेकल बा ।