कैलाली क्षेत्र नम्बर ५ के एकल उम्मेदवार मै हुँः भण्डारी
पहुरा समाचारदाता
धनगढी, ७ कुँवार । नेपाली काग्रेंसके महासमिति सदस्य क्षितिज भण्डारी अपने कैलाली क्षेत्र नम्बर ५ के एकल उम्मेदवार रहल बटैले बटैं ।
शुकके धनगढीमे पत्रकार सम्मेलन मार्फत भण्डारी क्षेत्र नम्बर ५ के लाग सिफारिश हुइल डा. आरजु राणा देउवा समानुपातिक रोजलपाछे अपने एकल उमेदवारके रुपमे रहल बटाइल हुइट ।
‘प्रतिनिधीसभाके लाग कैलाली क्षेत्र नम्बर ५ से हम्रे दुई जाने किल उम्मेदवारी पेस करल रही’, उहाँ कहलै– ‘मने राणा समानुपातिक रोजलपाछे मै क्षेत्र नम्बर ५ के निर्विकल्प उम्मेदवार हुइटु ।’
उहाँ आघे कहलै– ‘पार्टीमे औरे केक्रो दावी नैरहे, उहेमारे एकल उम्मेदवार हुइल हुइल बटुँ, मै काठमाडौँ नेताके घरमे नैहो, जनताके घरघरमे जैटी रहल बाटुँ, मत फेन मग्टी रहल बटुँ ।’
महासमिति सदस्य भण्डारी धनगढीहे क्षेत्रियता ओ जातियताके मैदान बनाइल कहटी उहाँ धनगढीहे साझा धनगढी बनैना प्रतिवद्धता करलै ।
‘धनगढीहे धनगढी नैबनाके क्षेत्रियता ओ जातियताके खेल मैदान बनाइल बावै’, उहाँ कहलै– ‘इहीहे चिरके हम्रे धनगढीके हुइटी कना आभास डेहुवाइना मेरके धनगढी बनैबु ।’
उहे बिच उहाँ चुनावी घोषणा पत्र फेन सार्वजनिक करले बाटै । उहाँसे सार्वजनिक करल घोषणापत्रमे धनगढीहे समृद्ध ओ विकशित महानगरपालिका बनैना, शिक्षा, स्वास्थ्य, औषधि उपचार लगायतके सेवासुविधा नागरिकके लाग सहज पहुँच कैना, धनगढी विनानस्थल ओ गौरीफन्टा नाकाके स्तरोन्नती, शैक्षिक बेरोजगार युवाहे बेरोजगार भत्ता लगायत रहल बा ।
