गरिबी निवारणमे बीमा कम्पनीके भूमिका
पहुरा समाचारदाता
धनगढी, ७ कुँवार । अर्थमन्त्री जनार्दन शर्मा गरिबी निवारणमे बीमा कम्पनीके महत्वपूर्ण भूमिका रहल बटैले बटैं ।
शुक्रके रोज धनगढीमे बीमा समितिके सुदूरपश्चिम प्रदेश कार्यालयके उद्घाटन करटि अर्थमन्त्री शर्मा नेपालमे पर्याप्त स्रोत साधन रलेसे फेन ओकर उपयोग करे नैसेकल बटैलैं । उहाँ कलैं, “नेपालमे रहल स्रोत साधन उपयोग करेबेर प्राकृतिक जोखिम रहल ओरसे कोइ ओम्ने लगानी नैलगाइठ ।” “यदि उ स्रोत परिचालन करेबेर जोखिम बा कलेसे बीमा कराके लगानी कराई सेक्जाइठ,” उहाँ कलैं, “प्राकृतिक प्रकोपमे परे सेक्ना उत्पादनमूलक कार्य करेबेर जोखिम न्यूनीकरणमे बीमाके महत्वपूर्ण योगदान बटिस ।” “यदि किसानसे लगाइल अन्नबाली प्राकृतिक जोखिममे बा कलेसे ओइसिन ठाउँमे खेती कैके बीमा करे परल” उहाँ कलैं । अइसिन करलेसे बाढपहिरोके जोखिममे फेन उत्पादन करे सेक्ना, किसानहुक्रे फेन क्षति पाइना ओ सरकारहे फेन उ क्षतिके राहतमे सहजहुइना उहाँ बटैलैं ।
ओस्टेके, औरे प्रसंगमे अर्थमन्त्री शर्मा देशके आर्थिक अवस्था सुधारोउन्मुख हुइटि रहल बटैले बटैं । उहाँ कलैं, “कुछ राजनितिक दलके नेताहुक्रे देशके अवस्था श्रीलंका हुइटा कहिके भ्रम पैदा करे खोज्लेसे फेन अवस्था ओइसिन नइहुइल हो ।” उहाँ देशके आर्थिक अवस्था कुछ विग्रलेसे फेन सरकारसे नानल स्पष्ट मौद्रिक नीतिके कारण अर्थतन्त्र सुधार हुइटिरहल बटैलैं । उहाँ सरकार किल लागके अर्थतन्त्र सुधार नैहुइना हुइल ओरसे यम्ने सक्कु सरोकारवाला साथ ओ सहयोगके आवश्यक रहल बटैलैं । उहाँ उत्पादन वृद्धि करटि निर्यात बह्रैना ओ आयत घटैना ओर तीनु तहके सरकार ओ सम्वद्ध संस्था काम करलेसे राष्ट्रवाद ओ ढिल काम करलेसे राष्ट्रघात हुइना बटैलैं ।
ओस्टेके, कार्यक्रममे बीमा समितिके अध्यक्ष सूर्यप्रसाद सिलावल नेपालके सक्कु तह–तप्कामे बीमासम्बन्धी सेवा पुगाइक लाग प्रदेशमे फेन कार्यालय नानल बटैलैं । उहाँ यी कार्यालय प्रदेशमे रहल बीमा कम्पनीहे प्रवद्र्धन, नियमन, अनुगमन कैके चुस्तदुरुस्त बन्ना विश्वास व्यक्त करलैं । ओस्टेके, उहाँ कुछ फेन चिजके कम रकममे बीमा कैके भारी क्षति हुइलसे बीमासे सहयोग पुग्न बटैलैं । उहाँ यी कार्यालयसे बीमा अभियानमे सहयोग पुग्न हुइल ओरसे यम्ने जे जहाँ बा वहैंसे सहयोग करना आग्रह करलैं ।
कार्यक्रममे बीमा समितिके निर्देशक राजुरमण पौडेल मुलुकमे टमान जोखिममे जनताहे सहयोग पुगाइक लाग बीमा करेपरना आवश्यक रहल बटैलैं । उहाँ जे बीमा करे नैसेकेवाला हो ओकर बीमा सरकारसे करलेसे उहाँहुकन सहयोग हुइना बटैलैं । कार्यक्रममे बीमा समिति सुदूरपश्चिम प्रदेश कार्यालयके प्रमुख ओमबहादुर अधिकारीलगायत मन्तव्य व्यक्त करले रहैं । कार्यक्रम बीमा समितिके अध्यक्ष सूर्यप्रसाद सिलावलके अध्यक्षतामे हुइल रहे ।
