कैलारीमे प्रारम्भिक बालविकास योजना लागु
गाउँपालिका अध्यक्षके अध्यक्षतामे पालिका स्तरीय प्रारम्भिक बालविकास समिति गठन
पहुरा समाचारदाता
हसुलिया, ७ कुवाँर । कैलालीके कैलारी गाउँपालिकामे एकिकृत प्रारम्भिक बालबालिका विकास योजना लागु कैना प्रतिवद्धता जनाइल बा ।
कैलारी गाउँपालिकाके अध्यक्ष, उपाध्यक्ष, वडा अध्यक्ष, प्रमुख प्रशासकीय अधिकृत, सामाजिक विकास अधिकृत लगायत विषयगत शाखाके प्रमुखहुकनके दुई दिने छलफल कार्यक्रमपाछे एकिकृत प्रारम्भिक बालबालिका विकास योजना लागु प्रतिवद्धता जनागिल हो ।
गाउँपालिका अध्यक्ष राजसमझ चौधरी शिक्षाके बल्गर जग बालबालिकासे सुरु हुइना बटैटी एकिकृत प्रारम्भिक बालबालिका विकास योजना लागु कैना बटैलै । गाउँपालिका हरेक बालबालिकाके अभिभावक समेट हो,’ अध्यक्ष कहलै, ‘जग बल्गर बनाइक लाग टमान कार्यक्रमके योजना बनाइल बा । उ योजना अनुसार आघे बह्रना गाउँपालिका प्रतिबद्ध बा ।’ गैल एसइइ परिक्षाको रिजल्टप्रति सन्तुष्ट नइरहल कहटी शिक्षामे ढेर ध्यान डेहे पर्ना अवस्था आइल उहाँ बटैलै । गाउँपालिका अध्यक्ष समुदायमे रहल बालविकास केन्द्रहे पालिकासे विशेष प्राथमिकतामे रख्ना प्रतिवद्धताफे जनैलै ।
कैलारी गाउँपालिकाके उपाध्यक्ष भगवतीकुमारी चौधरी बालबालिका भविष्यके कर्णधार रहल कहटी बालबालिकामे लगानी करे पर्नामे जोड डेहल रही । उहाँ पालिकाहे बालमैत्री बनैना प्रतिवद्धता जनैले बटी ।
कैलारी गाउँपालिकाके प्रमुख प्रशासकीय अधिकृत विरबहादुर ऐर पालिकाहे बालमैत्री बनैना ८० ठो सुचक पार करे पर्ना ओ कैलारीसे ढेर सुचक पुरा करसेकल जनैलै । उहाँ गर्भावस्थासे ८ बर्षसमके बालबालिकाके लाग गाउँपालिकासे स्थानीय तहमे एकिकृत प्रारम्भिक बालबालिकाके लाग योजना बनाइल बटैलै ।
यूनिसेफके हेल्थ अफिसर काली पुन स्थानीय तहहे बालबालिकाके सवालहे केन्द्रमे धारके बजेट बनैना आग्रह करले बटी । सेतो गुराँस बालविकास सेवाके कार्यक्रम संयोजक शसी विसी बालबालिकाके लाग निर्माण हुइल स्थानीय तहमे एकिकृत प्रारम्भिक बालबालिकाके योजना कार्यान्वन अइनामे विश्वास व्यक्त करली ।
सक्कु वडाके अध्यक्षहुक्रे अपन–अपन वडामे गर्भास्वथासे लेके ८ बरससमके बालबालिकाके विकासके लाग नानल योजना बनाके सार्वजनिक करले बटै ।
ओस्टेक कैलारी गाउँपालिकामे गाउँपालिका राजसमझ चौधरीके अध्यक्षतामे पालिका स्तरीय समिति गठन हुइल बा । समितिके सदस्यमे कार्यपालिका सदस्य तथा वडा नम्बर ३ अध्यक्ष सन्तराम चौधरी, सामाजिक विकास अधिकृत यगम कलेल, शिक्षा यूवा तथा खेलकुद शाखा प्रमुख गणेश प्रसाद मिश्र, स्वास्थ्य शाखा प्रमुख विरेन्द्र सापकोटा, महिला तथा बालबालिका शाखा प्रमुख बालकुमारी चौधरी, खानेपानी तथा सरसफाई शाखाके शंकर अवस्थी, पीसवीन कैलालीके जिल्ला कार्यक्रम संयोजक शान्ति मगर, सदस्य सचिव प्रमुख प्रशासकीय अधिकृत विरबहादुर ऐर रहल बटै ।
कैलारी गाउँपालिकाके आयोजना, पिसविन कैलालीके सहकार्य ओ यूनिसेफ, सेतो गुराँस बालविकास सेवाके संयुक्त सहयोगमे संचालन हुइल स्थानीय तहमे एकिकृत प्रारम्भिक बालबालिकाके लाग दुई दिने योजना तर्जुमा कार्यशाला छलफलपाछे पालिका स्तरीय समिति गठन हुइल हो ।
पालिका स्तरीय समिति स्थानीय तहके सरोकारवालाहे एकिकृत प्रारम्भिक वालविकासके अवधारणबारे जानकारी करैना, प्रारम्भिक बालविकासके क्षेत्रमे टमान शाखासे हुइल कार्यक्रम एकिकृत कैना, प्रारम्भिक बाल्य अवस्थाके बालबालिकाहुकनके सर्वागिण विकासके अधिकारहे सुनिश्चित कैना स्थानीय तहके भुमिका प्रवद्र्धन कैना ओ स्थानीयतहमे तर्जुमा कैना बार्षिक तथा आवधिक योजनामे प्रारम्भिक बालविकासके क्षेत्रमे लगानी अभिवृद्धि करके गुणस्तर अभिवृद्धि कैनामे मद्दत पुगैना उद्देश्यसे योजना समिति गठन ओ योजना तयार करल पिसविन कैलालीके जिल्ला कार्यक्रम संयोजक शान्ति मगर जानकारी डेली । कार्यक्रमके संचालन सामाजिक विकास अधिकृत यगम कलेल करल रहिट । ओ दुई दिनसम संचालन हुइल कार्यक्रममे सेतो गुराँस बालविकास सेवाके कार्यक्रम संयोजक शसी विसी ओ रमा थपलिया सहजीकरण करले रहिट ।
