स्वास्थ्य कार्यक्रमके पालिका स्तरीय समिक्षा

पहुरा समाचारदाता
हसुलिया, ७ कुवाँर । कैलालीके कैलारी गाउँपालिकासे सम्पादित स्वास्थ्य कार्यक्रमके पालिका स्तरीय समिक्षा करले बा ।

गाउँपालिका अध्यक्ष राजसमझ चौधरीके वडका पहुनामे हुइल कार्यक्रममे आर्थिक बर्ष २०७८÷०७९ सालमे गाउँपालिकासे सम्पादित स्वास्थ्य कार्यक्रमके पालिका स्तरीय समिक्षा करल हो । कार्यक्रममे बोल्टी उहाँ पालिकासे स्वास्थ्य क्षेत्रमे ढेर लगानी करल बटैलै ।

गर्भवती सुत्केरीहे कैलाली जिल्लाभिटर डेलीभरीके लाग लैजाई परलेसे निशुल्क एम्बुलेन्सके व्यवस्था, कैलारी गाउँपालिकाके विरामीनहे निशुल्क रगतके व्यवस्था करल उहाँ बटैलै । वडा नम्बर ५ मे १५ शैयाके अस्पतालके लाग टेन्डर प्रक्रिया पुराके काम आघे बह्रल उहाँ बटैलै । ओस्टेक सक्कु वडाके स्वास्थ्य चौकी ओ प्राथमिक स्वास्थ्य केन्द्रसे रहल समस्या समधानके लाग आघे बह्रना उहाँ जनैलै ।

गाउँपालिका उपाध्यक्ष भगवतीकुमारी चौधरीके अध्यक्षतामे हुइल कार्यक्रममे गाउँपालिकाके ९ वडामे रहल प्रथामिक स्वास्थ्य केन्द्र ओ स्वास्थ्य चौकीसे गैल आर्थिक बर्षमे प्रदान करल स्वास्थ्य सेवाबारे जानकारी डेहल बा ।

उहाँ पालिकासे बिपन्न तथा दीर्घ रोगीनहे निशुल्क स्वास्थ्य बीमा, सिकल सेलके बिरामीहे यातायात खर्च, गर्भवती तथा सुत्केरीके लाग निशुल्क एम्बुलेन्स सेवा गर्भवती, सुत्केरी, ज्येष्ठ नागरिक, महिला स्वा.स्वयंसेविका,अपांगता रहल ब्यक्ति तथा अति बिपन्न ब्यक्तिहे निशुल्क प्रयोगशाला सेवा, सिकल सेल जांच तथा परामर्श सेवा करल उहाँ बटैली ।

कार्यक्रममे वडा नम्बर ८ मे रहल प्राथमिक स्वास्थ्य केन्द्र उदासीपुरके प्रमुख रामकिशोर चौधरी सेवा डेहक लाग भवन प्रर्याप्त रहल मने दरबन्दी अनुसार स्वास्थ्यकर्मी नइहुके सेवाग्राहीके चाप बह्रल बटैलै । उहाँ ३ बर्ष यहोर सक्कु गर्भवती स्वास्थ्य संस्थामे केल बच्चा जन्माइल बटैलै । होम डेलिभरी शुन्यमे झरल उहाँ बटैलै । प्राथमिक स्वास्थ्य केन्द्रसे ८२ जाने टमान मेरिक मानसिक समस्या रहल व्यक्ति सेवा लेटी रहल, वडा नम्बर ८ मे केल १९ जाने सिकलसेलके विमारी रहल उहाँ बटैलै ।
कैलारी गाउँपालिकाके नौ वडामे ४ हजार ४ सय १४ परिवार स्वास्थ्य विमा करके सेवा लेटी रहल प्रमुख चौधरी बटैलै । ओस्टेक करके पालिकासे प्रत्येक महिनाके दुसरा साता निशुल्क आँखा शिविरके आयोजना करटी आइलफे उहाँ जनैलै ।

कार्यक्रममे सक्कु वडामे संचालन रहल स्वास्थ्य चौकीके प्रमुख आ अपन स्वास्थ्य संस्थासे प्रदान करल गतिविधिबारे जानकारी करैले रहिट । गैल आर्थिक बर्षमे मजा प्रगति करल वडा नम्बर ३ के हसुलिया स्वास्थ्य चौकी प्रथम हुइल, वडा नम्बर ८ के उदासीपुर प्राथमिक स्वास्थ्य केन्द्र दुसरा ओ वडा नम्बर ९ के गदरीया स्वास्थ्यचौकीहे टिसरा हुइल बा । ओइनहे गाउँपालिका अध्यक्ष राजसमझ चौधरी प्रमाणपत्रसहित सम्मान करले बटै ।

कार्यक्रमके संचालन सिनियार आहेव अधिकृत नरेश चौधरी ओ स्वागत मन्तव्य स्वास्थ्य शाखा प्रमुख विरेन्द्र सापकोटा करले रहिट । कार्यक्रममे गाउँपालिकाके सक्कु वडाके वडा अध्यक्ष, प्रमुख प्रशासकीय अधिकृत विरबहादुर ऐर, सामाजिक विकास शाखा अधिकृत यगम कलेल, स्वास्थ्य कार्यालय धनगढीके कुलतनारायण चापागाँई, टमान शाखाके प्रमुखहुकनके सहभागिता रहल रहे ।