निसर्ग हस्पिटलमे चिरफारबिना पाठेघरके अप्रेसन सुरु
पहुरा समाचारदाता
धनगढी, ७ कुवाँर । धनगढीके हसनपुरमे रहल निसर्ग हस्पिटल एण्ड रिसर्च सेन्टर प्रा.लि.से नियमित रुपमे चिरफार बिना पाठेघरके अप्रेसन सुरु करल बा ।
अस्पतालसे ल्याप्रोस्कोपी प्रविधिके मद्दतसे पाठेघर निकर्ना शल्यक्रिया प्रविधि प्रयोग करके चिरफार बिना पाठेघरके अप्रेसन सुरु करल हो । पछिल्का कुछ समययहोर पाठेघरके बिरामी यी विधिसे उपचार कैना आकर्षित हुइटी रहल बटै । चिरफार नइकरके पाठेघरके अप्रेसन करेबेर बिरामीहे कम पीडा महसुस हुइना, अप्रेसन करल तीन दिनमे घर पठाई सेक्ना, संक्रमणके सम्भावना कम हुइना ओ बिरामी हाली अपन नियमित काममे लौटे सेक्ना निसर्ग हस्पिटलके स्त्री तथा प्रशुती रोग विशेषज्ञ डाक्टर नजमुस्वबा अन्सारी बटैली ।
निसर्ग हस्पिटलके स्त्री तथा प्रसुती रोग विशेषज्ञ डा.नजमुस्वबा अन्सारी, स्त्री तथा प्रसुतीरोग विशेषज्ञ डा. सुरेन्द्र भट्ट, ऐनेस्थेसियोलोजिस्ट डा. हेमन्त ओझा लगायतके टिमसे चिरफार बिना पाठेघरके अप्रेसन सेवा डेहल हस्पिटल जनैले बा ।
