थाकस कंचनपुरके नवौं अधिवेशन हुइल
सागर कुस्मी
कंचनपुर, ८ कुवाँर । थारु कल्याणकारीणी सभा कंचनपुरके नवौं जिल्ला अधिबेशन सनिच्चरके रोज निप्टल बा । इ नवौं अधिबेशन बेलौरीमे रहल थाकसके अंगनामे निप्टल हो ।
कार्यक्रममे बर्का पहुना थारु कल्याणकारीणीके सभाके केन्द्रीय सदस्य प्रभात कुमार चौधरी रहिंट । उहाँ नवौं अधिबेशनके सफलताके डेटि कहलैं, अइना दिनमे एक होके आघे बर्हे पर्ना बटैलैं ।
थारु समाजके हकहितके लाग निरन्तर आघे बर्हटी रहल थाकस, थारु समुदायके एक्केठो किल साझा संगठन रहल बटैलैं । उहाँ थारु समुदायके पहिचानके लाग हुइल हरेक आन्दोलनमे सबसे ढेर योगदान रहल बटैलैं । उहाँ कहलैं, जब जब थारुनके पहिचान ओ मुद्दाके सवालमे थाकस गम्भीर होके आघे बर्हटी रहल बटैलैं ।
कार्यक्रममे बिशिस्ट पहुना रहल कंचनपुरके प्रमुख जिल्ला अधिकारी गोपाल प्रसाद आर्याल कार्यक्रमके सफलताके सुभकामना डेले रहिंट । उहाँ थारु समुदायके संस्कृतिहे बचाके निरन्तर आघे बर्हे पर्ना बटैलैं ।
ओस्टेके कार्यक्रमके बिशिस्ट पहुना थाकसके सल्लाहकार देवीलाल चौधरी थारु स्मुदायके पहिचानके सुरक्षाके लाग सक्कु जाने अपन अपन ठाउँसे आघे बर्हे पर्ना बटैलैं । उहाँ कहलैं, राज्यके हरेक अंगमे पहुँचके लाग थाकस ढेर भुमिका खेलल बटैलैं ।
कंचनपुर बेलौरी नगरपालिकाके नगरप्रमुख पोतीलाल चौधरी अपने नगरप्रमुख हुइलमे थारु समुदायके लाग निरन्तर विकासके काममे काम करल बटैलैं । उहाँ कहलैं, सामाजिक कामके लाग सक्कुहुनके साथ सहयोग चाहठ, ओहेमारे सक्कु जहन एक होके जाइ पर्ना कहलैं ।
ओस्टेके थारु बिद्यार्थी समाजके केन्द्रीय सदस्य ठाकुर करियाप्रधान, थारु मुक्तीके लाग, थारु दासत्व उन्मुक्तिके लाग थाकस सबसे ढेर भुमिका रहल बटैलैं । उहाँ कहलैं, अइना दिनमे थारु संस्कृति बचाइक लाग पुस्टा हस्तान्तरण करे पर्नामे जोर डेलैं । लावा युवा पुस्टाहे संस्कृति हस्तान्तरण करे पर्ना आवस्यक रहल बटैलैं ।
थाकस कैलालीके कार्यबाहक सभापति माधव थारु, थाकसके अपन छुट्टे ऐतिहासिक गरिमा रहल बटैलैं । उहाँ थारुनके हरेक माग, मुद्दाहे थारु कल्याणकारीणी सभा मार्फत आघे बर्हे पर्ना अर्जि करलैं । अइना दिनमे युवा पुस्टाहे सामाजिक क्षेत्रमे लागे पर्ना बटैलैं ।
कार्यक्रममे स्वागत मन्तव्य नगरभलमन्सा अमरसिंह चौधरी, वडा नम्बर ५ के वडा अध्यक्ष लाल बहादुर चौधरी, नेपाल रानाथारु समाजके केन्द्रीय सदस्य प्रेमवती राना, थाकस कंचनपुरके पुर्व सभापति बासुदेव राना लगायत अपन अपन सुभकामना मन्तव्य डेले रहिंट ।
ओस्टेके सामाजिक क्षेत्रमे योगदान डेहल टमान व्यक्तित्व ओ आजीवन सदस्य ओइनहे सम्मान फेन कैगैल रहे । संस्कृति संरक्षण सम्वर्धन करल लाग टमान साँस्कृतिक नाचगान फेन डेखागैल रहे ।
निवर्तमान सभापति मेवाराम चौधरीके सभाअध्यक्षमे निप्टल कार्यक्रम संचालन उपाध्यक्ष सानू चौधरी कैले रहिंट । कार्यक्रममे वुद्धिजिवी, समाजसेवी, शिक्षक, विद्यार्थी, जनप्रतिनिधि लगायत लोगनके सहभागी हुइल रहिंट ।
