एसपीए कलेजहे अन्तर्राष्ट्रिय ग्रीन कलेज अवार्ड

पहुरा समाचारदाता
धनगढी, ११ कुँवार । धनगढीस्थित सुदूरपश्चिमाञ्चल एकेडेमी (एसपीए) कलेज अमेरिकाके न्यूयोर्क शहरमे आयोजित एक भव्य समारोहकाबीच अन्तर्राष्ट्रिय ग्रीन कलेज अवार्ड २०२२ प्राप्त करले बा ।

संयुक्त राज्य अमेरिकाके न्युयोर्कमे सेप्टेम्बर २४ (असोज ८ गते) आयोजित “ग्रीन स्कुल कन्फरेन्स, २०२२” मे एसपीए कलेजहे उ अवार्ड प्रदान करगिल । भारतमे स्थापना हुइल ओ विश्वके ४० देशमे शैक्षिक क्रियाकलापसे स्थानीय वातावरणके क्षेत्रमे काम करटि आइल ग्रीन मेन्टर्स नामक संस्था उ अवार्ड प्रदान करटि आइल बा । यी कार्यक्रम संयुक्त राष्ट्रसंघके आर्थिक तथा सामाजिक काउन्सिल अन्तर्गत रहल बा ।

अन्तर्राष्ट्रिय ग्रीन कलेज अवार्ड पैना एसपीए नेपालके एकठो किल कलेज रहल कलेजके निर्देशक सुवास शाही बटैलैं । ४० देशके दुई हजार ढेर शैक्षिक संस्था सहभागी रहल उ ग्रीन स्कुल कन्फरेन्स, २०२२ मे एसपिएके लाग हाल न्युयोर्कमे रहल कलेजके पूर्व कर्मचारी हर्कबहादुर बोहरा अवार्ड ग्रहण करले रहैं ।

एसपीएके निर्देशक शाहीके अनुसार शैक्षिक क्रियाकलापसे स्थानीय वातावरण संरक्षणमे निर्वाह करल भूमिकाहे प्रमुख आधार बनाके उ अवार्ड प्रदान करजाइठ ।

एसपीए कलेज सन् २०१२ से ‘ग्रीन क्लिन धनगढी’ क्लव विस्तार करटि वातावरण संरक्षणके क्षेत्रमे काम करटि आइल बा । उ क्लवमे एसपीए कलेजमे अध्ययनरत विद्यार्थीहुक्रे ग्रीन भोलेन्टियर्स (हरित स्वयंसेवक) के रुपमे आवद्ध रहल बटैं । क्लवमार्फत एसपीए प्रमुख तथा सहायक बजार, विद्यालय, छात्रावास, धार्मिक तथा सार्वजनिक क्षेत्र, सरकारी निकायमे, डुबान क्षेत्रलगायतके स्थानमे वृक्षरोपण करटि आइल निर्देशक शाही बटैलैं ।

एसपीएके कलेज प्रमुख योगराज उपाध्याय अन्तर्राष्ट्रिय ग्रीन कलेज अवार्ड प्राप्त करना गौरवके विषय रहल प्रतिक्रिया डेलैं । उहाँ कलैं– यी अवार्डसे हम्रे डेटिरहल गुणस्तरीय शिक्षा, विद्यार्थीहुकनके सर्वांगिण विकासके साथे वातावरण संरक्षणके क्षेत्रमे निर्वाह करटिआइल भूमिकाके सम्मान करले बा ।

ग्रीन क्लिन क्लवके सदसय स्यामुयल न्यौपानेके प्रतिक्रिया बा– ग्रीन कलेज अवार्डसे हमार लम्मा समयसे वातावरण संरक्षणके क्षेत्रमे करटि आइल प्रयासके अनुमोदन हुइल बा । यी हमार विद्यार्थी ओ कलेजके लाग गौरवके क्षण हो । उहाँ हरेक शैक्षिक संस्थामे ग्रीन भोलियन्टर्स तयार अभियान सञ्चालन हुइटिरहल बटैलैं ।

एसपीएमे स्नातकोत्तर तहमे एमएड, एमबीएस तथा स्नातक तहमा बीए, बीबीएस, बीएड, बीएचएम, बीआईएम तथा एकवर्षे बीएड कार्यक्रम लागू बा । उबाहेक प्लस टूमे विज्ञान, व्यवस्थापन, शिक्षा, मानविकी, कानुन, होटल म्यानेजमेन्ट, आमसञ्चार ओ पत्रकारिता विषयमे अध्ययन अध्यापन हुइटि आइल बा ।