स्वास्थ्य क्षेत्रके जिल्लास्तरीय वार्षिक समीक्षा सुरु

पहुरा समाचारदाता
धनगढी, ११ कुवाँर । कैलाली जिल्लामे आर्थिक वर्ष २०७८/०७९ के जिल्लास्तरीय वार्षिक समीक्षा तथा योजना तर्जुमा गोष्ठी सुरु हुइल बा ।

स्वास्थ्य कार्यालय धनगढीके आयोजनामे मंगरसे सुरु हुइल जिल्ला स्तरीय वार्षिक समीक्षा कार्यक्रममे कैलालीके १३ स्थानीय पालिकाके स्वास्थ्य शाखासे आ–अपन पालिकामे आर्थिक वर्ष २०७८/०७९ मे कैगिल स्वास्थ्य कार्यक्रमके गतिविधि प्रस्तुतिकरण करटी रहल बटै ।

स्वास्थ्य कार्यालयके प्रमुख लालबहादुर धामीके अध्यक्षतामे हुइल कार्यक्रममे सुदूरपश्चिम प्रदेशके स्वास्थ्य निर्देनालय दिपायलके स्वास्थ्य निर्देशक डा. जगदिश जोशी विगतके तुलनामे स्वास्थ्य क्षेत्रमे सुधार अइटी रहल मने अभिन ढेर सुधार करे पर्ना बटैलै ।
जिल्ला समन्वय समिति कैलालीके सभापति पदम कलेल जिल्लाके टमान पालिकामे स्वास्थ्य सुधारके सुचांकमे हेरेबेर सन्तोषजनक विल्गाइल बटैलै ।

कैलालीके प्रमुख जिल्ला अधिकारी किरण थापा कैलालीमे कोरोना भाइरस, डेङुके समस्या जुझटी रहल बेला लागु औषध, सडक दुर्घटना, आत्मा हत्या करुइयाके संख्या बह्रल बटैले बटै ।

बुधसम चल्ना जिल्ला स्तरीय वार्षिक समिक्षा कार्यक्रममे कैलालीके १३ स्थानीय पालिकाके स्वास्थ्य शाखाके प्रमुख तथा प्रतिनिधिहुकनके सहभागिता रहल बा ।