गाउँपालिका अध्यक्षसहित ४६ जनहनसे रक्तदान

पहुरा समाचारदाता
हसुलिया, १५ कुवाँर । कैलालीके कैलारी गाउँपालिकामे कैगिल रक्तदान कार्यक्रममे ४६ पिन्ट रगत संकलन हुइल बा ।

नेपाल रेडक्रस सोसाइटी उपशाखा कैलारी गाउँपालिका तदर्थ समितिके आयोजना तथा कैलारी गाउँपालिकाके सहकार्य ओ कैलारी यूथ यूनाइटेड हसुलिया, नेपाल तरुण दल कैलारी समन्वयमे रक्तदान कैगिल हो ।

कार्यक्रमके वडका पहुना रहल गाउँपालिका अध्यक्ष राजसमझ चौधरीके अपनही रक्तदान कैके यूवाहुकनहे रक्तदान करे परठ कना सन्देश डेहल रहिट ।

उहाँ कहलै, ‘एक पिन्ट रगत डोनेशन कैडेले कोई मनै नयाँ जीवन पाई सेक्ठै । स्वास्थ्य मनै हरेक तीन–तीन महिनामे रक्तदान करलेसे और नयाँ रगत उत्पादन हुके जोश जाँगर बह्रठ ।’
यिहीसे आघे कैलारी गाउँपालिकासे सुत्केरी, गर्भवती महिलाहुकनहे स्वास्थ्य संस्थासम पुगाइक लाग निशुल्क एम्बुलेन्सनके व्यवस्था, विमारीनहे निशुल्क रगत उपलब्ध कैना घोषणा कैसेकल गाउँपालिका अध्यक्ष बटैलै ।

नेपाल रेडक्रस सोसाइटी उपशाखा कैलारी गाउँपालिका तदर्थ समितिके सभापति श्रीराम चौधरीके अध्यक्षतामे हुइल कार्यक्रममे विशिष्ट पहुना नेपाली काँग्रेस कैलारीके सभापति कृष्णप्रसाद चौधरी, नेपाल रेडक्रस रक्त संचार केन्द्र धनगढीके प्रमुख धरनीधर पन्त, नेपाल रेडक्रस सोसाइटी कैलालीमे मन्त्री लोकराज जोशी, वडा नम्बर ६ के वडा अध्यक्ष प्रेमबहादुर चौधरी, कैलारी यूथ यूनाइटेड हसुलियाके अध्यक्ष बनसराम चौधरी लगायत पहुनाके सहभागिता रहल नेपाल रेडक्रस सोसाइटी उपशाखा कैलारी गाउँपालिका तदर्थ समितिके उपसभापति मिना चौधरी बटैली ।

कार्यक्रममे वडका पहुना समेट रहल गाउँपालिका अध्यक्ष राजसमझ चौधरी लगायत ४६ जाने रक्तदान कैनाके साथे डशियाके शुभकामना अदानप्रदानफे कैगिल बा ।