बाँके चौफेरी गाउँके ७५ घरपरिवारहे सारगिल

पहुरा समाचारदाता
बाँके, २१ कुवाँर । अविरल वर्षाके कारण राप्ती लडियामे आइल बाढसे बाँके डुडुवा गाउँपालिका–१ के चौफेरी गाउँके ७५ घरपरिवारहे स्थान्तरण करल बा ।

वर्षासे लडियामे आइल बाढसे गाउँ पूरे डुबानमे परके घरभिटरफे पानी पैठलपाछे गाउँ लग्गे रहल आश्रयस्थलमे सारल जिल्ला आपत्कालीन कार्य सञ्चालन केन्द्रके सूचना व्यवस्थापन अधिकृत रुपन ज्ञवाली बटैलै ।
उहाँक अनुसार बाढसे गाउँ डुबानमे परलपाछे रेडक्रसकर्मी, प्रहरीसहितके टोली स्थानीयवासीहे उद्धार करके आश्रयस्थलमे धारल हो । अधिकृत ज्ञवाली कहलै, ‘चौफेरी गाउँके दर्जनौँ घरमे पूर्ण क्षति हुइल प्रारम्भिक जानकारी बा, अभिनफे वर्षा रोकल नइहो, बाढ घटलपाछे केल क्षतिके विवरण संकलन करे सेक्जाई, अब्बे पहिल प्राथमिकता कहल मनैनहे सुरक्षित रख्ना हो ।’
बाँकेके तल्लो तटीय क्षेत्रके करिब तीन सय घर डुबानमे परल बटै कलेसे दर्जनौं घरमे क्षति पुगल बा ।

वर्षासे राप्ती लडियामे आइल बाढसे बाँके डुडुवा गाउँपालिका– १ अन्तर्गत पर्ना चौफेरी, कृषि चौफेरी ओ पाझा गाउँके तीन सय घर डुबानमे परल बटै । बाढसे घरभिटर पानी पैठके धारल अन्नपात लत्ताकपडा भिजके क्षति पु¥याइल स्थानीयवासी गणेश गुप्ता बटैलै ।

राप्ती लडिया ओ खोलाके बीचमे रहल उ गाउँवासी त्रस्त बटै । घरभिटर पानी पैठलपाछे गाउँपालिकासे निर्माण करल आश्रयस्थलमे धारल गाउँपालिकाके अध्यक्ष नरेन्द्रकुमार चौधरी बटैलै । अभिनफे वर्षा हुइटी रहल बा ।
वर्षाके कारण राप्ती लडिया खतराके तह पार करले बा । लगातारके अविरल वर्षासे बाँकेके कुसुमस्थित राप्ती लडियामे पानीके सतह पाँच दशमलव ९५ मिटर पार करले बा । राप्ती लडियामे पानीके सतह पाँच मिटर ४० सेन्टिमिटर पुगलपाछे खतरा मानजाइठ । आज बिहान ६ः३० बजे कुसुममे लडियाके सतह पाँच दशमलव ९५ मिटर पुगल बाँकेस्थित जलमापन केन्द्र जनैले बा ।

अभिनफे निरन्तर वर्षा हुइटी रहल ओरसे खतराके तह बढे सेक्ना ओरसे आसपासके नागरिकहे उच्च सतर्कता अपनैना प्रमुख जिल्ला अधिकारी सूर्यबहादुर खत्री आग्रह करलै ।
राप्ती लडियामे बाढ आइलपाछे तल्लो तटीय क्षेत्रके फत्तेपुर, गङगापुर, होलिया, बेतहनी, कम्दी गाउँलगायत स्थानमे बाढ आइठ । नेपालगञ्ज, कोहलपुर, खजुरा बजार क्षेत्रके अधिकांश स्थानमे पानी जमल बा । अभिनफे वर्षा हुइटी रहल ओरसे सर्वसाधारणहे आवतजावत कैना कठिनाइ हुइल बा ।