जल तथा मौसम विज्ञान विभागसे सतर्क अपनैना आग्रह
पहुरा समाचारदाता
धनगढी, २१ कुवाँर । विफेक रोजसे निरन्तर बरसटी रहल पानीसे एक्कासी बाढ आइसेक्ना कहटी कैलाली ओ कञ्चनपुरबासीहुकन जल तथा मौसम विज्ञान विभाग सतर्क अपनैना आग्रह करले बा ।
पछिल्का तीन घण्टा कैलाली ओ कञ्चनपुरके ढेर ठाँउमे जोरसे पानी बरसल कहटी ओ अभिन आइसेक्ना कहटी सतर्क अपनैना आग्रह करल हो । खुटिया, मोहना, कटैनी, कान्द्रा, काढा, सुहेली चौधर लगायत लडियामे एक्कासी बाढ आइसेक्ना कहटी ढेङ ठाउँमे बैठना जल तथा मौसम विज्ञान विभाग आग्रह करल हो ।
कैलाली ओ कञ्चनपुर जिल्ला जोरना झोलुङे पुल जोखिममे
कैलाली ओ कञ्चनपुर जिल्ला जोरना मोहना लडियामे बनल झोलुङे पुल जोखिममे परल बा । कैलालीके धनगढी उपमहानगरपालिका–१३, श्रीलंका ओ कञ्चनपुरके कृष्णपुर नगरपालिका–८ मजगाइ जोरना पुल मोहना लडियामे आइल बाढके कटानसे उच्च जोखिममे परल हो ।
मजगाइके स्थानीय रामु कुश्मीके अनुसार कुछ साताआघे आइल बाढसे जोखिममे परल पुल पुनः निरन्तरके वर्षापाछे आइल बाढसे पुहना अवस्थामे पुगल हो । कैलालीके प्रमुख जिल्ला अधिकारी किरण थापा पुलके अवस्था बुझके तत्काल कटान रोकथामके प्रक्रिया सुरु कैना बटैलै । कञ्चनपुर प्रशासनसंगफे समन्वय करके प्रक्रिया आघे बहै्रना प्रजिअ थापाके कहाई बा ।
