डेवारीक अवसरमे उत्तरमंझरामे सांस्कृतिक कार्यक्रम हुइना
पहुरा समाचारदाता
हसुलिया, २५ कुवाँर । अइटी रहल टिहुवार डेवारीके सुभ अवसरमे सांस्कृतिक कार्यक्रम हुइक लाग बा ।
कैलालीके कैलारी गाउँपालिका २ उत्तर मंझरामे रहल श्री सरस्वती जनहित युवा क्लवके आयोनजनामे सांस्कृतिक कार्यक्रम हुइ जैटी बा । कार्यक्रम इहे कात्तिक १२ ओ १३ गते हुइक लाग बा ।
थारु भासा, साहित्य, संस्कृति ओ कलाहे प्रोत्साहन कैना हिसाबसे इ कार्यक्रमके आयोजना करल आयोजक क्लवके अध्यक्ष मनोज चौधरी जानकारी डेलैं ।
उहाँक् अन्सार, कार्यक्रममे कैलारी गाउँपालिका अन्तर्गतके टमान नाचगान डेखाजैना बा । सखिया नाच, झुमरा नाच, हुरडुँगुवा नाच लगायत कैयो मेरके नाच फेन हेरे मिल्ना बा ।
कार्यक्रममे राष्ट्रिय थारु कलाकारनसे गायन ओ नाचगान प्रस्तुत हुइना बा कलेसे थारु भासा, साहित्यमे लम्मा समयसम लग्ढार कलम चलैटी रहल साहित्यकारनके फेन रचना बाचन हुइना आयोजके कहाइ बा ।
कार्यक्रममे स्थानीय लोगनके प्रतिभाहे फेन कार्यक्रममे बिशेष ठाउँ डेना हुइल ओर्से इच्छुक ओइने अपन नाउँ समयमे दर्ता कराइक लाग आयोजक अर्जी फेन कैले बा । थारु गीतबाँस, गजल, मुक्तक, कविता सुनाइ चहुइयन हलि आयोजक लोगनहे अपन नाउँ दर्ता करैले हलि पाला मिल्ना आयोजक जनाइल ।
कार्यक्रम भव्य ओ सभ्यसे सफल पारक लाग कैलाली जिल्लाके टमान सरकारी तथा गैरसरकारी सरोकारवाला निकाय ओइनसे सहकार्य ओ सहयोगके लाग तयारी हुइटी रहल अध्यक्ष मनोज चौधरी बटैलैं । कार्यक्रम दिनके हुइना आयोजक जनैले बा ।
