प्रदेश जनस्वास्थ्य प्रयोगशालाके प्रदेश स्तरीय समिक्षा गोष्ठी सुरु

पहुरा समाचारदाता
धनगढी, २५ कुवाँर । प्रदेश जनस्वास्थ्य प्रयोगशालाके दुई दिने प्रदेश स्तरीय समिक्षा गोष्ठी मंगरसे धनगढीमे सुरु हुइल बा ।

आर्थिक वर्ष २०७८÷७९ मे हुइल कार्य प्रगति ओ अइना योजना लगायतके विषयमे छलफलके लाग समिक्षा गोष्ठी हुइल लागल हो । गोष्ठीके प्रदेशके सामाजिक विकास मन्त्रालयके सचिव दीपक लामिछाने समुदघाटन करलै । सचिव लामिछानेसे प्रदेश सरकारसे योजनावद्ध रुपमे स्वास्थ्य क्षेत्रके सुधारके लाग काम करटी रहल बटैलै । उहाँ प्रदेशके स्वास्थ्य क्षेत्र सुधारमे प्रमुख समस्या जनशक्ति अभाव रहल औल्यइटी ‘निर्वाचन लगत्ते करारमे सेवा लेहे हुइलेसेफे स्वास्थ्य संस्थामे पदपूर्ति कैना बा ।’ उहाँ जनताके सेवाके लाग हाल हाली काम कैना ओर सक्कु जे जवाफदेहि हुई पर्ना बटैलै ।

स्वास्थ्य निर्देशनालयके निर्देशक डाक्टर जगदिश जोशी पूर्वाधार, जनशक्ति ओ उपकरण अभावमे फे स्वास्थ्य क्षेत्रके सुधारके लाग क्रमिक रुपमे काम हुइटी रहल बटैलै । उहाँ चिकित्सा ओ जनस्वास्थ्य क्षेत्रमे प्रयोगशालाके महत्वपूर्ण भुमिका रहल बटैलै । उहाँ प्रयोगशालासे प्रदेशमे रहल प्रयोगशालाके गुणस्तर नियन्त्रणमे ध्यान डेना जरुरी रहल बटैलै ।

प्रयोगशालाके निमित्त निर्देशक रामप्रसाद ओझाके अध्यक्षतामे हुइल कार्यक्रममे प्रदेशिक स्वास्थ्य आपूर्ति व्यवस्थापन केन्द्रके निर्देशक डाक्टर निरज अर्याल, अस्पताल विकास तथा चिकित्सा सेवा महाशाखा प्रमुख डाक्टर चेतराज जोशी, प्रादेशिक आयुर्वेद चिकित्सालयके निमित्त निर्देशक डाक्टर खगेन्द्र बम, स्वास्थ्य कार्यालय कैलालीके प्रमुख लालबहादुर धामी लगायतके सहभागिता रहल रहे । कार्यक्रममे प्रदेशके नौ जिल्लाके सरकारी अस्पताल तथा जनस्वास्थ्य ल्याबमे कार्यरत कर्मचारीहुकनके सहभागिता रहल बा ।