धनगढी वडा क्लिनिकसे ५९३ जाने लेलै सेवा

पहुरा समाचारदाता
धनगढी, २६ कुवाँर । धनगढी उप–महानगरपालिकासे सञ्चालन करल वडा क्लिनिकमे ५ सय ९३ जाने सेवा लेले बटै ।

उप–महानगरपालिकासे कुवाँर २४,२५ ओ २६ गते सञ्चालन करल विशेषज्ञ वडा क्लिनिक सेवासे पाँच सय ९३ जाने स्वास्थ्य सेवा लेहल हुइट । धनगढी उपमहानगरपालिकाके वडा नम्बर १३, ११ ओ ६ मे वडा क्लिनिक सञ्चालन करल रहे ।

एक सय ९२ जाने जनरल फिजिसियनसे ओ ५७ जाने स्त्री तथा प्रसुती रोग विशेषज्ञ चिकित्सकसे सेवा लेहल हुइट । तीन सय ४४ जाने आँखा रोग सम्बन्धी सेवा, ३६ जाने प्रयोगशाला, २८ जाने अल्ट्रासाउन्ड, २४ जाने ईसीजी ओ ३० गर्भवती महिलासे सेवा लेहल उपमहानगरपालिका जनैले बा । ४२ जाने ७० वर्ष उप्परके सेवा लेले बटै कलेसे एक सय ६ जाने बिरामीहे रेफर करल बा ।