साढे ३ कुन्टल ढेर अवैध बोइलर मुरगी नष्ट
पहुरा समाचारदाता
हसुलिया, २७ कुवाँर । कैलालीके कैलारी गाउँपालिका हसुलियामे रहल इलाका प्रहरी कार्यालयसे विफेक रोज साढे ३ कुन्टलसे ढेर अवैध बोइलर मुरगी नष्ट करले बा ।
इलाका प्रहरी कार्यालय हसुलियासे प्रहरी वरिष्ठ नायव निरीक्षक राम सिंह बोहराके कमाण्डमे खटल प्रहरी टोली कैलारी–४ यमबहादुर सुनारके घर लग्गे रहल अस्थायी रुपमे बनाइल मुरगी खोरमे रहल भारतसे अवैधरुपमे नानल बोइलर मुरगी नष्ट करल हो ।
भारतसे अवैध रुपमे वोईलर मुरगी नानल बा, कना विषेश सूचनाके आधारमे खोजतलास करेबेर भारतसे अवैध रुपमे आयात करके नानल १४४ ठो वोईलर मुरगी खोरमे फेला पारल उहाँ बटैलै ।
उहाँ कहलै, ‘रित पुर्वक बरामद करके मान्यता प्राप्त तराजुमे नापतौल करेबेर ३ कुन्टल ५४ किलो ८ सय ग्राम रहल उ मुरगी विफेक रोज समाजसेवी, बुद्विजिवी, जनप्रतिनिधि, कैलारी कुखुरा तथा माछापालन व्यावसायी संघके पदाधिकारी, पत्रकार ओ स्थानीय मनैनके रोहवरमे नष्ट करल बा ।’
