एकल प्रचार नैकैना कांग्रेस केन्द्रीय सदस्य वडके आग्रह
पहुरा समाचारदाता
धनगढी, २८ कुँवार । नेपाली कांग्रेसके केन्द्रीय सदस्य नृपबहादुर वड संयुक्त लोकतान्त्रिक वाम गठबन्धनके उम्मेदवारहे एकल प्रचार नैकैना आग्रह करले बाटै ।
संयुक्त लोकतान्त्रिक वाम गठबन्धन निकटके पत्रकारहुक्रनके धनगढीमे अयोजित भेलामे बोल्टी उहाँ ओइसीन आग्रह करल हुइट । अलग–अलग प्रचार करेबर गठबन्धनमे तिक्तता आइ सेक्ना कहटी उहाँ ओइसीन बटाइल हुइट । कैलालीमे गठबन्धनके उम्मेदवारके जित निश्चित हुइल बटैटी केन्द्रीय सदस्य वड बिगतके तुलनामे प्रचारशैलीहे व्यवस्थित करल समेत उहाँके कहाइ बा ।
ओस्टके कार्यक्रममे बोल्टी केन्द्रीय सदस्य वड गठबन्धन राष्ट्रिय आवश्यकता रहल ओरसे यकर सक्कु पालना करे पर्नामे समेत जोड डेलै । उ कार्यक्रममे बोल्टी नेपाली कांग्रेसके जिल्ला सभापति नारायणदत्त भट्ट कैलाली जिल्लामे गठबन्धनसे प्रचार-प्रचार समपति गठन ओ सम्पर्क कार्यालय स्थापना करटी रहल बटैलै ।
भेलामे नेपाली कांग्रेसके सचिवद्वय केशव मिश्र, नृप सुनार ओ प्रचार विभाग प्रमुख तपेन्द्र भुषाल, प्रेस सेन्टर नेपाल कैलालीके अध्यक्ष तेजराज भट्ट, समाजवादी प्रेसके कैलाली अध्यक्ष लक्ष्मीप्रशाद जैशी लगायत टमान शुभेच्छुक पत्रकार संगठनके प्रतिनिधीहुक्रनके सहभागिता रहल रहे ।
भेलाके सहजिकरण नेपाल प्रेस युनियन कैलालीके अध्यक्ष श्रवण देउवा करल रहिट ।
