कृषि विद्युतिकरणमे ढेर महत्वः गापा अध्यक्ष राजसमझ
पहुरा समाचारदाता
हसुलिया, २८ कुवाँर । खाद्य बस्तुके उत्पादन बह्राइक लाग कृषि विद्युतिकरणमे महत्व डेहल कैलारी गाउँपालिकाके अध्यक्ष राजसमझ चौधरी बटैले बटै ।
४२ औं विश्व खाद्य दिवसके अवसरमे शुकके रोज हसुलियामे कैलारी गाउँपालिका कृषि शाखा ओ सामाजिक सेवा अध्ययन केन्द्रके आयोजनामे हुइल एक कार्यक्रममे बोल्टी उहाँ उ बाट बत्वाइल हुइट ।
सिचाईमे उपलब्धता पुगाई सेक्लेसे केल चैत धान, बैशाखी मकै ओ बेमौसमी टिना खेती करके बाँझो जमिनहे प्रयोग करे सेक्जाई,’ अध्यक्ष राजसमझ कहलै,‘ कैलारी गाउँपालिकामे सिचाईमे ढेर महत्व डेहे परठ कहिके कार्यपालिका बैठकसे निर्णय करले बटी । अइना दिनमे चैते धान, बैशाखी मकै ओ बेमौसमी तरकारी उत्पादन बह्राइक लाग कृषि विद्युतिकरणमे ढेर ध्यान डेहल बटी ।’
गाउँपालिका अध्यक्षसे यिहे सालसे चैत धान ओ बैशाखी मकै खेती करुइयाहे अनुदान डेना उदघोषफे करलै । उहाँ कहलै, हमार ढेर जैसिन खेतीवारी बाँझो रहठ । बैशाखी मकै लगुइया कृषकहे अवसिक सालसे प्रतिकटठा ६ सयके दरसे अनुदान डेबी । यहाँ मुरगी, छेगरी, गैया भैसिनीय, पालन फर्म बा । उत्पादन हुइल दाना ओम्नेहे खपट करे सेक्जाई ।’
ओस्टेक सिचाईके लाग किसान डाडु भैयनहे मै क कहले बटु कलेसे डेढ विघा चैते धान खेती करुइयाहे १८ हजार नगद अनुदान उपलब्ध करैबी । जिहीसे किसान बोरिङ गरही ।
यहाँके किसानके समस्याके लाग गाउँपालिका आत्मसात कैना तयार रहल कहटी किसाननके प्रोत्साहनके लाग मालपोतमे आधा छुट डेना निर्णयफे हुइल उहाँ बटैलै । खाद्य दिवस मनैटी रहल बेला सक्कुहुन चिन्ताके विषय बा । उहाँ कहलै, हम्रे करेसबारी करठी मने धानवालीसे लेके मिर्चा, प्याजफे भारतसे नाने पर्ना अवस्था बा ।’
उत्पादनके क्षेत्रमे कैलाली जिल्ला तेस्रो स्थानमे हुइसेकठ । जिल्ला भरमे कैलारी गाउँपालिका एक नम्बरमे परठ । मने यहाँके लडियाके कारण किसान डाडुभैयासे लगाइल धानवालीमे क्षति पुगैटी रहल अध्यक्ष राजसमझ चौधरी कहलै ।
अध्यक्ष कहलै, ‘४२औ अन्तर्राष्ट्रिय खाद्य दिवस मनैटी रहल बेला बाढके कारण कैलारीके टमान टोलके मनै भोकमारीके अवस्थामे बटै ।
मोहना लडियासे खेतीयोग्य जमिन सहिट घरबास पुहाइल कारण कैलारी–३ शिवरत्नपुरके १६ परिवार टेन्ट सहित गाउँपालिकाके कार्यालयमे बैठे सेक्ना कहटी आइल अवस्था बा ।’ बर्सेणी मोहना, घुरहा, कटनी लडियासे विपद नित्याइटी गैल कहटी यी बरसे सबसे ढेर बाढसे अब्बे १६ घरपरिवारहे उठीबास बनाइल उहाँ कहलै ।
अध्यक्ष कहलै, हम्रे समयमे सचेत हुई नइसेक्ले अइना दिनमे भारी समस्या आइ । कैलारी–७ मे दुई ठो काठे पुल पुहलपाछे पुनः निर्माण करे परल । वडा–३ के निर्माणधिन झोलुङ पुल पुहल, वडा–८ के झोलुङे पुलफे खतरा अवस्थामे बा ।’
कैलारी गाउँपालिका खाद्यन्नके भल्गर क्षेत्रके रुपमे रहल बा मने बाढके कटान, पटान ओ डुबानके कारण पाछे परल उहाँ बटैलै ।
कार्यक्रममे कैलाली गाउँपालिका प्रमुख प्रशासकीय अधिकृत विरबहादुर ऐर जल वायु परिवर्तनके कारण हाइब्रेट जातके विउ विजन प्रयोग बह्रल बटैलै । उहाँ कहलै, ढेर उत्पादन हुइना आशमे किसानसे उन्नत जातके विउ प्रयोग करेबेर रैथाने जातके धानवाली हेराइल बा ।’
कार्यक्रममे कैलारी गाउँपालिकाके पशु शाखा प्रमुख सूर्य बहादुर चौधरी परम्पगत खेती प्रणाली हेराइल बटैलै । विषादी प्रयोग करके खेतीपति करल कारण मानव स्वास्थ्य संगे वातावरणमेफे असर परल उहाँ बटैलै ।
वडा सदस्य टिकाकुमारी भुल अत्याधिक रासायनिक मलके प्रयोगसे जमिन विग्रति गैल ओ वहाँसे उत्पादन हुइल बस्तुसे मानव स्वास्थ्यमे प्रतिकुल असर परल बटैली ।
महिला संजालके अध्यक्ष गीताकुमारी चौधरी पुर्खनसे लगैटी आइल रैथाने धानवालीके विया हेरैटी ओरसे संरक्षण कैनामे जोड डेली । अन्डी धान थारु सामुदायके संस्कृतिसे जोरसे ओरसे बाँचल मने करङगी, सौठयारी, अंगना, कृष्णभोग, सुगापङखी लगायतधानके विया हेराइल उहाँ बटैली ।
कृषक संजालके अध्यक्ष धर्मा चौधरी रैथाने जातके धानवली लगुइयाहे अनुदानके व्यवस्था करेसेक्लेसे संरक्षण करेसेक्ना बटैलै । कार्यक्रममे सामाजिक सेवा अध्ययन केन्द्रके परियोजना अधिकृत केशवराज घिमिरे खाद्यके अवस्था ओ महत्वबारे प्रस्तुतीकरण करले रहिट ।
कार्यक्रमके संचालन कैलारी गाउँपालिकाके सामाजिक विकास अधिकृत यगम कलेल ओ स्वागत मन्तव्य आर्थिक विकास संयोजक तथा वडा–५ के अध्यक्ष विष्णु प्रसाद चौधरी करले रहिट । कार्यक्रममे गाउँपालिकाके टमान शाखाके प्रमुख, कार्यपालिका सदस्य, वडा सदस्य, महिला तथा कृषक समुहके सदस्य, इलाका प्रहरी कार्यालय हसुलियाके प्रमुख रामसिंह बोहरा, टमान सहकारीके प्रतिनिधिहुकनके सहभागिता रहे ।
