पिरवा गोहटियाके उद्धार
पहुरा समाचारदाता
सुखड, २९ कुँवार । संकटापन्न सूचीमे रहल पिरवा गोहटिया (सुनगोहोरो) भेटल बा । घोडाघोडी नगरपालिका–१, जनकपुरमे शनिच्चरके सकारे विश्वमे संरक्षित प्रजातिके गोहटिया फेला परल हो । उहीहे स्थानीय पुतली सापकोटाके खेट्वामे धान कट्टी रहल बेला डेखल रहिट ।
स्थानीय नविन पुरी महत्वपूर्ण प्रजातिजैसिन लागलपाछे ईलाका वन कार्यालय, सुखडके समूह सुरक्षित उद्धारके लाग खबर करल रहे । डिभिजन वन कार्यालय पहलमानपुरके डिभिजन प्रमुख गोकुल रिजाल संकाटपन्न प्रजातिके रुपमे रहल गोहटियाहे उद्धार कैके सुरक्षित स्थानमे छोरल बटैलै ।
राष्ट्रिय निकुञ्ज तथा वन्यजन्तु संरक्षण विभागसे घिस्रना जातके जन्तुअन्र्तगत पिरवा गोहटीनहे अधिक चोरी शिकार ओ अवैध व्यापार हुइना प्राणीके सूचीमे राखल बा ।
गोहटीनके चोरीसिकारी ओ अवैध व्यापार करुइयाहे कडा सजायके कानुनी व्यवस्था समेत करल विभाग जनैले बा ।
स्थानीय संरक्षणकर्मी दयाराम चौधरी बनवा ओ पानी रहल क्षेत्रमे बैठ्ना गोहटिया अण्डा पारक लाग सुरक्षित स्थान खोज्टी खेट्वामे पुगल हुइ सेक्ना बटैलै ।
