कर्ण मल्लहे नैसघैना एमालेके घोषणा
पहुरा समाचारदाता
धनगढी, २९ कुवाँर । नेकपा एमाले, डडेलधुरासे नेपाली कांग्रेस बीपीसंग करल चुनावी तालमेल भंग हुइल घोषणा करले बा ।
एमालेसे प्रतिनिधिसभामे कांग्रेस बीपीके कर्ण मल्लहे सघाइल रहे कलेसे प्रदेशसभाके क ओ ख दुनुमे कांग्रेस बीपीसे एमालेहे सघैना सहमति हुइल रहे । उ अनुसार एमालेसे चत्रप्रसाद स्नेहीके उम्मेदवारी समेत फिर्ता कराइल रहे ।
मने अपनेहुकनसंग हुइल सहमति विपरीत कांग्रेस बीपी प्रदेशसभा ‘ख’ मे स्वतन्त्र उम्मेदवारसंग तालमेल करल कहटी एमालेसे आपत्ति जनैले बा । एमाले, डडेलधुराके शुकके बैठल बैठकपाछे जारी विज्ञप्तिमे कहल बा, ‘कांग्रेस बीपीसंग करल चुनावी तालमेल भंग करके एकल रुपमे निर्वाचनमे लग्ना निर्णय बैठकसे करले बा ।’
यी निर्णय कार्यान्वयन हुइलेसे डडेलधुराके प्रतिनिधिसभामे एमालेके उम्मेदवार कोई नइरही । प्रदेशसभामे भर क मे पठान सिंह बोहरा ओ ख मे गजेन्द्रबहादुर शाही उम्मेदवार बटै ।
