वीमा स्वास्थ्य क्षेत्रके मजा योजना
पहुरा समाचारदाता
धनगढी,३० कुवाँर । स्वास्थ्य वीमा बोर्डके प्रदेश स्तरीय बार्षिक समिक्षा अँटवारसे धनगढीमे सुरु हुइल बा ।
नेपाल सरकार स्वास्थ्य वीमा बोर्डके आयोजनामे हुइल कार्यक्रममे सामाजिक विकास मन्त्रालयके प्रदेश निमित सचिव गणेशबहादुर सिंह वडका पहुना रहल रहिट । उदघाटन कार्यक्रममे बोल्टी उहाँ स्वास्थ्य वीमा कार्यक्रम सरकारके स्वास्थ्य क्षेत्रमे मजा योजना रहल बटैलै ।
स्वास्थ्य वीमा कार्यक्रमहे प्रभावकारी बनैना समयानुकुल योजना थप करटी लैजाई पर्ना उहाँ बोर्डहे सुझाव डेले बटै । कैलाली जिल्लासे परिक्षण प्रोजेक्टके रुपमे सुरु हुइल स्वास्थ्य वीमा कार्यक्रम अब्बे ७७ जिल्लामे पुगल उहाँ बटैलै । कैलाली जिल्लामे स्वास्थ्य वीमाकर्ता करिब ९० प्रतिशत पुगल मने अब्बे वीमाकर्तासे नविकरण नइकरके विचमे छोरना क्रम बह्रल कहटी कारण खोजे पर्ना निमित्त सचिव सिंह बटैलै । अब्बे नयाँ स्वास्थ्य वीमाकर्ता बनैनासेफे पुरानाहे गुणस्तरीय सेवा दिनाओर ध्यान जाई पर्ना उहाँ बटैलै ।
सामाजिक विकास मन्त्रालयके वरिष्ठ स्वास्थ्य तथा शिक्षा अधिकृत हेमराज खडका स्वास्थ्य वीमाके प्याकेज बढाई पर्नामे जोड डेलै । अब्बे पाँज जाने सदस्य रहल परिवार बार्षिक ३५ सय तिरके स्वास्थ्य वीमा करेबेर एक लाखके उपचार करे पैना अवस्था बा । उहाँ कहलै, वीमा शुल्क ३५ सयसे बढाके ५ हजार पुगैना मने उपचारफे पाँच लाख समके डेहे सेक्लेसे ठप वीमितके संख्या बह्रे सेक्ना बटैलै ।
कार्यक्रममे स्वास्थ्य वीमा सुदूरपश्चिम निर्देशनालयके निर्देशक रमेश मलासी, सेती प्रादेशिक अस्तालतका स्वास्थ्य वीमा फोकल पर्सन दिपक मल्ल, नेपाल पत्रकार महासंघ कैलालीके सचिव प्रेम चौधरी, सुदूरपश्चिम उपभोक्ता हकहित संरक्षण मञ्चके सचिव भोजराज जोशीलगायत मन्तव्य राखल रहिट ।
कार्यक्रमके अध्यक्ष तथा नेपाल सरकार स्वास्थ्य वीमा बोर्डके कार्यकारी निर्देशक दामोदर बसौला आर्थिक बर्ष २०७९÷०८० सम स्वास्थ्य वीमा करुइयाके संख्या ५० प्रतिशत पुगैना बटैले बटै । उहाँ स्वास्थ्य वीमा कार्यक्रम सफल बनैना सक्कु स्वास्थ्य संस्था, तथा नागरिकके सहयोग आवश्यक रहल बटैलै ।
कार्यक्रम संचालन वीमा बोर्डके सिनियर आहेव भगवान रेग्मी करले रहिट । कार्यक्रममे आर्थिक वर्ष २०७८÷०७९ अवधिसमके समष्टिगत प्रगति विवरणके प्रस्तुती, जिल्ला ओ प्रदेशके प्रस्तुती कैगिल बा । सोम्मारसम चल्ना कार्यक्रममे सुदूरपश्चिम प्रदेशके टमान जिल्लासे स्वास्थ्य वीमा कार्यालयके प्रतिनिधिहुकनके सहभागिता रहल बा ।
