पाठयक्रममे आधारित शिक्षक क्षमता विकास तालिम

पहुरा समाचारदाता
धनगढी, १ कार्तिक । आधारभूत तह (कक्षा १–३) के एकिकृत ढाँचाके पाठयक्रममे आधारित सात दिने शिक्षक क्षमता विकास तालिम मंगरके रोज सम्पन्न हुइल बा ।

सेतो गुराँस राष्ट्रिय बाल विकास सेवाके आयोजनामे सामाजिक विकास मन्त्रालय शिक्षा तालिम केन्द्र दिपायल डोटीके सहकार्य तथा कैलारी गाउँपालिका, पिसविन नेपाल कैलाली (शान्तिदिप) ओ युनिसेभके संयूक्त सहयोगमे ‘नेपालममा प्रारम्भिक बालशिक्षा र विकासको सवलीकरणका लागि प्रारम्भिक सिकाई तथा विकास मापदण्ड कार्यान्वयन परियोजना’ से शिक्षक क्षमता विकास तालिम डेहल हो ।

तालिम समापन कार्यक्रमके वडका पहुना रहल कैलारी गाउँपालिकाके उपाध्यक्ष भगवतीकुमारी चौधरी शिक्षण सामाग्री बनाके विद्यार्थीके रुची अनुसार पठनपाठन कराई पर्ना बटैले बटी । उहाँ कहली, ‘हम्रे पढाईबेर सैद्धान्तिक विधि अपनके शिक्षा डेहे सेक्ठी मने व्यवहारिक शिक्षाफे अतिआवश्यक बा ।’ सात दिने तालिममे सिखल ज्ञान सीप अनुसार दैनिक जीवनमे प्रयोग हुइना बस्तुके माध्यमसे विद्यार्थीन अध्यापन कराई, क्रियाकलाप कराई पर्ना उपाध्यक्ष बटैली ।

कार्यक्रममे कैलारी गाउँपालिकाके शिक्षा शाखा प्रमुख गणेश प्रसाद मिश्र विद्यार्थीके भविष्य ओजरार ओर लैजैना जिम्मेवारी शिक्षकके हातमे रहल बटैलै । उहाँ कहलै, सिकाई उपलब्धी न्युन हुके विद्यार्थी संख्याफे घटटी रहल बटै । विद्यालय जैना छोट बालबालिकाहे शिक्षकसे जा कहठै उहे सिक्ना हुइल ओरसे बाल विकास (इसिडी) ओ कक्षा १ मे ढेर ध्यान ढेहे परठ ।
तालिममे आधारभूत तह कक्षा १–३ के पाठयक्रमके आधारणबारे जानकारी कैना, विषयगत सक्षमता ओ सिकाई उपलब्धीबारे स्पष्ट कैना, विषय क्षेत्र अनुसार एकिकृत रुपमे शिक्षण सिकाई क्रियाकलाप संचालन कैना सक्षम हुइना, विद्यार्थी सिकाई लेखाजोखा प्रणालीबारे बुझाई प्रष्ट कैना, विद्यार्थी केन्द्रिमे शिक्षण विधि तथा शैक्षिक सामाग्री निर्माण ओ प्रयोगबारे क्षमता विकास कैना तालिमके आयोजना करल सिनियर तालिम अधिकृत कटक सिजापति बटैलै ।

पिसविन नेपाल कैलालीके कार्यसमिति सदस्य हर्कबहादुर ओलीके अध्यक्षतामे हुइल तालिम समापन कार्यक्रममे सहभागीके ओरसे पहाडीराम चौधरी ओ अन्जु शर्मा मन्तव्य व्यक्त करले रहिट । तालिमके सहजीकरण तथा समापन कार्यक्रमके संचालन पिसविन नेपाल कैलालीके जिल्ला परियोजना संयोजक शान्ति मगर करल रहिट ।

कैलारी गाउँपालिकाके ४१ ठो विद्यालयके शिक्षक, शिक्षिकाहुकनके सहभागितामे हुइल एक हप्ते तालिममे सेतो गुराँस राष्ट्रिय बाल विकास सेवाके तालिम अधिकृत रमा थपलिया ओ सिनियर तालिम अधिकृत कटक सिजापति प्रशिक्षण डेहल रहिट ।