बझाङ जीप दुर्घटनाः मृतकके सख्या आठ पुगल
पहुरा समाचारदाता
धनगढी, ३ कार्तिक । सुदूरपश्चिम प्रदेशके बझाङ जिल्ला मष्टा गाउँपालिका–१ चिउरीमे चैनपुरसे रनडाओर जैटी रहल जीप बुधके रोज दुर्घटना हुके मृतकके सख्या आठ पुगल बा ।
बुधके रोज सु.प.प्र.०४००१ च ०१११७ नम्बरके जीप सडकसे करिब ३ सय मिटर टरे गिरल जिल्ला प्रहरी कार्यालय बझाङ जनैले बा । दुर्घटना हुके जीपमे सवार ८ जानेक मृत्यु हुइल बा ।
मृत्यु हुइनामे मष्टा गाउँपालिका–२ बैठना लोकेन्द्र बहादुर खड्काके छाई १३ वर्षीय सम्झना खड्का, हेमराज खड्काके छावा १५ वर्षीय रोशन खड्का, हेमराज खड्काके छावा १४ वर्षीय प्रचण्ड खड्का, २८ वर्षीया बसन्ती धामी कठायत, बसन्ती धामी कठायतके छाइ ७ महिनाके दिक्षिका कठायत, ३८ वर्षीय वीरेन्द्र अधिकारी, कञ्चनपुर शुक्लाफाटा नगरपालिका–७ के ५० वर्षीय झरेन्द्र बोहरा ओ उहे गाउँपालिका–१ रनाडा बैठना ५० वर्षीया सिन्की देवी भण्डारी रहल बटै ।
साथे दुर्घटनामे घाहिल जीप चालक उहे गाउँपालिका–१ लेकी बैठना ३५ वर्षीय राजेश रोकायासहित १७ जानेक टमान अस्पतालमे उपचार हुइटी रहल बा ।
