गापा स्तरीय ब्याटमिन्टन प्रतियोगिता हुइल

पहुरा समाचारदाता
हसुलिया, ५ कुवाँर । कैलारी गाउँपालिका स्तरीय ब्याटमिन्टन खेल सनिबारके रोज कैलारी गाउँमे हुइल बा ।

कैलारी गाउँपालिका २ स्थित कैलारी गाउँक बजारमे रहल सहिद गेटके छैठो वार्षिक उत्सवके अवसरमे ब्याटमिन्टन प्रतियोगिता हुइल हो ।

इ खेलमे प्रमुख अतिथि उदघाटन लोकतान्त्रिक गठबन्धनके क्षेत्र नम्बर ३ के प्रतिनिधि सभा सदस्य उमेदवार कृष्ण कुमार चौधरी ९कुन्दन० रहिंट कलेसे विशिष्ट अतिथि क्षेत्र नम्बर ३ क के प्रदेश सभा सदस्य उमेदवार खेमराज डंगौरा थारु डुनु जाने संयुक्त रुपमे खेलके औपचारिक उदघाटन कैले रहिंट ।

प्रमुख अतिथि कहलैं, हमार थारु समुदायके खेलाडीनहे पेशागत रुपमे लागे पर्ना बटैलैं । अगामी दिनमे जब सम पेशागत रुपमे आघे लैजाइ नैसेकप टबकिल हमार खेलके विकास हुइ सेक्ना बटैलैं ।

विशिष्ट अतिथि कहलैं, खेलाडी हमार देशके कर्णाधार हुइटैं, ओहमारे, कैलारी गाउँपालिकामे एक वडामे एक खेल मैडान अवस्यक रहल बटैंलैं । अइना दिनमे खेलाडीनहे प्रोत्साहन हुइना मेरके कार्यक्रम लाने पर्ना बटैलैं ।

बजार समितिके अध्यक्ष आशाराम चौधरीके घरगोसियाइमे हुइल खेल कार्यक्रमके स्वागत मन्तव्य वडा २ के भुपु वडाध्यक्ष सन्तुराम चौधरी डेले रहिंट । इ खेलमे स्थानीय खेलाडी, बुद्धिजीवी, व्यापारी, विद्यार्थी लगायत ओइनके सहभागी हुइल रहे कलेसे जम्मा २६ ठो टीम भाग लेले रहे ।

खेल जिटुइया पहिलहे ६ हजार ५ रुपिया, डुसराहे ३ हजार ५ रुपिया, टिसराहे १५ सौ ५ रुपिया ओ बेस्ट प्राइज एक जहन खेलाडीहे छनौट कैके डेना आयोजक बटाइल ।