डेवारीमे पटाका पट्कैना ओ विक्रीवितरणमे रोक
रात १० बजेपाछे देउसीभैलो खेले नैपैना
पहुरा समाचारदाता
धनगढी, ६ कात्तिक । कैलालीमे डेवारीके समयमे पटाका पटैना स्थानीय प्रशासनसे रोक लगैले बा । कलेसे रात १० बजेपाछे देउसी भैलो खेले नैपैना हुइल बा । रमाइलाके नाउँमे पटाका पट्काइबर हुइना सम्भावित दुर्घटनाहे ध्यानमे राखके पट्कैना तथा बिक्रि वितरणमे रोक लगाइल जिल्ला प्रहरी कार्यालय जनैले बा ।
जिल्ला प्रहरी कार्यालयके प्रवक्ता प्रहरी नायब उपरीक्षक(डीएसपी) वेदप्रकाश जोशी पटाकासे हुइना वातावरण प्रदुषण, ध्वनी प्रदुषण तथा सम्भावित अप्रिय घटनाहे ध्यानमे राखके पट्कैना ओ बिक्रि वितरणमे रोक लगाइल जानकारी डेलै ।
कोइ ओकर उल्लंघन कैके पटाका पट्काइल पाइलमे प्रचलित कानूनअनुसार कारवाही कैना डीएसपी जोशी बटैलै । ओहकान अनुसार रात १० बजेपाछे देउसी भैलो समेत खेले नैपैना हुइल बा ।
रातके समयमे हुइ सेक्ना सम्भावित सुरक्षा चुनौतीहे ध्यान डेटी १० बजेपाछे देउसी भैलो खेले नैपैना डीएसपी जोशी बटैलै । टरटिहुवारके बेला हुइ सेक्ना सम्भावित घटनाहे ध्यानमे राखके सुरक्षा योजना अन्तर्गत जिल्लाके सुरक्षा व्यवस्था मजबुत पारल प्रहरी जनैले बा ।
