दहित थारुहुक्रे आज ढिक्री लुटैना
पहुरा समाचारदाता
धनगढी, ७ कार्तिक । आज डेवारीक् डिया बरना दिन संगे डहिट थारूहुकनके ढिक्री लुटैना तथा वितरण कर्ना दिन फेन परल बा ।
थारू समुदायमे डेउटनके प्रसाद स्वरुप रहल ढिक्रीहे आजझुक् रोज बेरीजुन डहिट थारूहुक्रे प्रसादके रुपमे लुटैना अर्थात वितरण कर्ना प्रचलन रहटी आइल हो ।
डहिट थारूहुक्रे आज आपन डेउटनके पूजा करलपाछे आसपासके लर्का, बरवार मनैनहे बलाके ढिकरी वितरण करटी आइल बाटै ।
धनगढी उपमहानगरपालिका–४ उत्तरवेहडीके थारू बुद्धिजीवी तथा डहिटथारू अगुवा दलबहादुर डहिट देवी दुर्गानके पूजा तथा सम्मानके लाग ढिक्रिक् डिया बर्ना प्रचलन डहिट थारूहुकनमे रहल जानकारी डेलै । पाछे उ ढिक्रीक् बनाइल डिया प्रसाद स्वरुप आसपासके लर्कनहे बलाके तीन पटक लुटैना प्रचलन रहल उहाँ बटैलै ।
डहिट थारूहुकनमे रहल ढिक्रि लुटैना प्रथा थारू समुदायके मौलिक तथा ऐतिहासिक संस्कारके रहल बा । जौन थारू समुदायमे डेवारी मनैना टौरतरिका फरक ओ मौलिक रहल एकठो उदारण समेत रहल थारू बुद्धिजीवीहुकनके दाबी बा ।
