६५ बरसमे वृद्ध भत्ता, ५ हजार सुत्केरी भत्ता
पहुरा समाचारदाता
धनगढी, १२ कात्तिक । सत्तारुढ प्रमुख दल नेपाली कांग्रेस चुनावी घोषणापत्र सार्वजनिक करले बा । अगहन चार गते हुइना प्रतिनिधि सभा ओ प्रदेश सभा निर्वाचनके लाग शनिच्चरके पार्टी केन्द्रीय कार्यालय सानेपामे प्रधानमन्त्रीसमेत रहल पार्टी सभापति शेरबहादुर देउवा तथा पार्टी पदाधिकारीहुक्रे घोषणापत्र सार्वजनिक करल हुइट । ‘संविधानके रक्षा स्थायित्व ओ समुन्नतिके आधार, नेपाली कांग्रेसके नेतृत्वमे आबके सरकार’ कना नारासहित कांग्रेस आपन घोषणापत्र सार्वजनिक करल हो ।
घोषणापत्रमे ज्येष्ठ नागरिक भत्ता ६५ बरसमे डेना घोषणा करले बा । घोषणापत्रमे वृद्धभत्ता डेना उमेर क्रमशः ६५ बरसमे झर्ना उल्लेख करल बा । कांग्रेस नेतृत्वके वर्तमान सरकारसे चालु आर्थिक बरसके बजेटसे ६८ बरस पुगल ज्येष्ठ नागरिकहे वृद्धभत्ता डेटी आइल बा ।
ओस्टके ६५ बरस उमेरके सक्कु ज्येष्ठ नागरिकके निशुल्क स्वास्थ्य बीमा कैना घोषणा करले बा । ओस्टके ७३ बरस पुगलहुक्रनके उपचार निशुल्क कैना घोषणा फेन करले बा ।
ओस्टके नेपाली कांग्रेससे ३÷७३ के नारा आघे सरटी तीन बरस टरेक बालबालिका ओ ७३ बरस उप्परके जेष्ठ नागरिकहे निःशुल्क उपचारके व्यवस्था कैना बटैले बा ।
साथे ५ बरस भित्रे सक्कु नागरिकके बिमा ओ बिमामार्फत गम्भीर प्रकृतिका रोगके उपचार सुनिश्चित कैना बटैले बा । यकर लाग बिमाके दायरा बह्राके १० लाख पुगैना समेत जनैले बा ।
६५ बरस उप्परके जेष्ठ नागरिक, अपांगता रहल व्यक्ति, अति विपन्न, अत अशक्त, एकल महिला, महिला तथा स्वास्थ्य स्वयंमसेविकाहे निःशुल्क बिमा कैना जनैले बा ।
पाँच बरसभित्रे स्वास्थ्य संस्था नैरहल २६०० वडामे आधारभूत स्वास्थ्य केन्द्र, सक्कु गाउँनगरपापलकामे विशेषज्ञ चिकित्सकसहित प्राथमिक अस्पताल ओ सक्कु उपमहानगर तथा महानगरमे विशेषज्ञ सेवासहित अस्पताल सञ्चालन कैना समेत जनैले बा ।
सक्कु महिलाहे निःशुल्क स्यानिटरी प्याड, हरेक स्थानीय तहमे एम्बुलेन्सलगायतके स्वाथ्य सम्बन्धी बाचा फेन कांग्रेसके घोषणापत्रमे रहल बा ।
ओस्टके कांग्रेससे सुत्केरी भत्ता ५ हजार पुगैना घोषणा करले बा । चालु आर्थिक बरससे सरकारसे मानव विकास सूचकांकमे पाछे परल २५ जिल्लाके सुत्केरीहे पाँच हजार रुपैयाँ सुत्केरी भत्ता डेटी आइल बा ।
ओस्टके कांग्रेससे आगामी एक दशकमे नेपालहे उद्यम–अनुकूल, मध्यम आय रहल समन्यायिक मुलुक बनैना घोषणा करले बा । कांग्रेससे एक दशकभित्रे चरम गरिबी एक अंकमे सीमित कैना संकल्प करले बा ।
घोषणापत्रमे काँगे्रेससे ५० युनिटसम खपत करुइयाहे बिजुली निःशुल्क डेनासे नागरिकके महत्वपूर्ण दस्तावेज ‘होम डेलिभरी’ कैनासम योजना समावेश करले बावै ।
कांग्रेससे अर्थतन्त्रमे रेमिट्यान्सके योगदान २३ प्रतिशतसे १०–१२ प्रतिशतमे झर्र्ना प्रतिवद्धता फेन करले बा । ओकर लाग स्वदेशमे सम्मानजनक रोजगारी ओ उद्यममैत्री वातावरण बनैना प्रतिज्ञा करले बा ।
ओस्टके घोषणापत्रमे आधारभूत तहसे नै ज्ञानमे आधारित अर्थ व्यवस्था निर्माणमे जोड डेना, स्कुल–कलेज तहसे नै सूचना–प्रविधिसम्बन्धी शिक्षा ओ तालिम डेना ओर सञ्चार पूर्वाधार निर्माण कैना ओ ओम्ने सर्वसाधारणके पहुँच पुगैना प्रोत्साहन कैना संकल्प करल बा ।
कनेक्टिभिटीसँग सम्बन्धित पूर्वाधार (सडक, हवाई, रेल, जल, ऊर्जा ओ डिजिटल सञ्जाल) मे बहुपक्षीय लगानी जुटैना ओ ओकर लाग झन्झटिला ऐन, नियम, प्रक्रिया सुधार कैना प्रतिज्ञा समेत करले बा ।
ओस्टके समग्र उत्पादनके लागत घटैना, तुलनात्मक लाभके क्षेत्रहे प्रतिस्पर्धी बनैना ओ बर्षेनी लाखौंके संख्यामे सम्मानजनक रोजगारी सिर्जना कैना कांग्रेसके प्रतिवद्धता रहल बा ।
घोषणापत्र महामन्त्री विश्वप्रकाश शर्मा नेतृत्वमे रहल ४१ सदस्यीय समितिसे तयार पारल हो । अर्थशास्त्री तथा योजना आयोगके पूर्व उपाध्यक्ष डा. स्वर्णिम वाग्ले, डा. गोविन्द पोखरेल, शिक्षाविद् डा. कृष्णप्रसाद पौडेल, राजनीतिक विश्लेषक तथा वैदेशिक मामिला जानकार गेजा शर्मा वाग्ले, शंकर तिवारीलगायत कांग्रेस नेताहुक्रे घोषणापत्र लिखल हुइट ।
