सही सूचना प्रवाह कैना आग्रह
पहुरा समाचारदाता
धनगढी, १२ कात्तिक । निर्वाचन आयोगके निर्वाचन आयुक्त डा. जानकीकुमारी तुलाधर निर्वाचनके बेला सञ्चार माध्यमहे सही सूचना प्रवाह कैना आग्रह करले बाटी ।
आगामी अगहन ४ गते हुइना प्रतिनिधिसभा ओ प्रदेशसभा सदस्यके निर्वाचन, २०७९ के सन्दर्भमे निर्वाचन आयोग ओ राष्ट्रिय समाचार समितिके सहकार्यमे शनिच्चरके धनगढीमे आयोजित सुदूरपश्चिमस्तरीय मिडिया अभिमुखीकरण कार्यक्रमके उद्घाटन कैटी आयुक्त डा. तुलाधर सत्यतथ्यमे आधारित सही एवं विश्वसनीय सूचना प्रवाह कैना आग्रह करल हुइटी ।
सञ्चारमाध्यमसे सही सूचना प्रवाह कैके आयोग ओ मतदाताबीच सेतुके काम कैना हुइल ओरसे उहाँ सञ्चारमाध्यम तथा पत्रकारहे मिथ्या सूचना, दुष्प्रचार ओ द्वेषपूर्ण अभिव्यक्तिसे बचके सन्तुलित ओ आधिकारिक सूचना डेना फेन आग्रह करल रही ।
आयुक्त तुलाधर संविधान ओ कानुनसे डेहल अधिकार ओ कार्य क्षेत्रबमोजिम आयोगसे निर्वाचनके समग्र व्यवस्थापन ओ तयारी करटी रहल समेत बटैली । उहाँ निर्वाचन आयोगसे सञ्चारमाध्यमसँगके सहकार्य ओ समन्वयहे फेन ओत्रे महत्व डेहल बटाइल रही । उहाँ निर्वाचनहे स्वच्छ, स्वतन्त्र ओ निष्पक्षरूपमे सम्पन्न करैना क्रममे आयोगके नेतृत्व ओ हमार सबके दायित्व कना मान्यताहे स्थापित करे पर्ना बटाइल रही ।
‘निर्वाचनके क्रममे सही सूचनाके संवाहक पत्रकार नै हुइट । पत्रकारके सही सूचना हमार लाग कोसेढुङ्गा हुइना बावै’, आयुक्त डा. तुलाधर कहली‘आम मतदातासे डेना हरेक मत बदर नहोए कनामे आयोग सचेत बा । ओकर लाग सञ्चार क्षेत्रके भूमिका महत्वपूर्ण रहठ् ।’
उहाँ निर्वाचनके समयमे आयोग ओ सञ्चारमाध्यमके सम्बन्ध नङ ओ मासुजस्टे हुइना करल बटैली ।
आयोगसे निर्वाचनके लाग समानुपातिक ओरके मतपत्र ढुवानीके काम करिब होसेकल ओ पहिल हुइना निर्वाचन प्रणाली ओरके मतपत्र छपाइ कार्य जारी रहल उहाा बटैली । आयोगसे सूचना प्रेस अफिस, कल सेन्टर, इ बुलेटिनजैसिन संयन्त्र सञ्चालन कैके सूचनाके सहज उपलब्धताके लाग काम करटी रहल समेत जानकारी कराइल रही ।
कार्यक्रममे निर्वाचन आयोगके सहसचिव तुलसी बहादुर श्रेष्ठ निर्वाचन आचार संहिता ओ आम संचार माध्यम ओ राष्ट्रिय समाचार समितिके प्रधान सम्पादक एकराज पाठक निर्वाचन ओ मिडिया बारे सहजीकरण करल रहिट ।
कार्यक्रममे मुख्य निर्वाचन अधिकृत ओमप्रसाद आर्याल, प्रमुख जिल्ला अधिकारी किरण थापा निर्वाचन सफल बनाइक लाग पत्रकारहुक्रनके महत्वपूर्ण भूमिका रहल बटाइल रहिट । कार्यक्रमके उद्देश्यबारे प्रदेश निर्वाचन कार्यालयके निमित्त प्रमुख प्रेम भट्ट जानकारी कराइल रहिट ।
कार्यक्रममे सुदूरपश्चिम प्रदेशके टमान मिडियामे आवद्ध पत्रकारहुक्रनके सहभागिता रहल रहे ।
