आगलागीसे एक करोड १३ लाखसे ढिउर क्षति

पहुरा समाचारदाता
चौमाला, १३ कात्तिक । कैलाली गौरीगंगा नगरपालिका वडा नम्बर १ चौमाला बजारमे आगलागी हुइल बा ।

चौमाला चोकमे रहल हिमाल मोबाइल ग्यालरीसे आगलागी सुरु हुइल हो । उ मोबाइल ग्यालरीसँगे ६ ठो पसलमे आगलागी हुइल प्रहरी जनैले बा । आगलागीसे १ करोड १३ लाख ५० हजार रुपैयाँ बराबरके क्षति हुइल जनाइल बा ।

शनिच्चर साँझ करिब साढे ७ बजे हिमाल मोबाइल ग्यालरीमे विद्युत सर्ट होके आगी लागल रहे । उ पसलमे लागल आगी नियन्त्रण नैहुइलपाछे औरे पसलमे फेन लागल रहे । आगलागीसे दुईठो मोबाइल पसल, एकठो हार्डवेयर पसल, दुईठो किराना पसल ओ एकठो होटलमे आगलागी हुइल जिल्ला प्रहरी कार्यालय जानकारी डेले बा ।

आगलागीसे गौरीगंगा नगरपालिका १ चौमालाके बिष्णुकुमार पाण्डेके लुम्बिनी होटलमे १ लाख ५० हजार बराबरके क्षति हुइल बा कलेसे, जयसिंह भण्डारीके भण्डारी किरानामे १५ लाख, पारस सापकोटाके बहराय मोबाइल ग्यालरीमे १० लाख, हिमाल पुन मगरके हिमाल मोबाइल ग्यालरीमे १२ लाखके क्षति हुइल जिल्ला प्रहरी कार्यालय कैलाली जनैले बा ।

उहे ठाउँके छविलाल खनालके पशुपति डम्मरा सप्लायर्समे ४५ लाख बराबरके क्षति हुइल बा कलेसे टंक प्रसाद आचार्यके आचार्य शु सेन्टरमे ३० लाख बराबरके क्षति हुइल जिल्ला प्रहरी कार्यालय कैलालीके प्रहरी नायब उपरीक्षक वेदप्रकाश जोशी बटैलै । सुरक्षाकर्मी स्थानीय लगायत गोदावरी ओ घोडाघोडी नगरपालिकाके दमकलके सहयोगमे रात ८ बजे ओर आगी नियन्त्रणमे आइल रहे ।