कैलाली–३ सत्तारुढ–गठबन्धनके उम्मेदवारके साझा प्रतिवद्धता सार्वजनिक
पहुरा समाचारदाता
सुखड, १३ कार्तिक । कैलाली निर्वाचन क्षेत्र नम्बर–३ से सत्तारुढ–गठबन्धनके उम्मेदवार अपन संयुक्त साझा प्रतिबद्धतापत्र सार्वजनिक करले बटै ।
प्रतिनिधि सभा सदस्यके उम्मेदवार कृष्णकुमार चौधरी(कुन्दन) तथा प्रदेशसभा क्षेत्र ‘क’ के उम्मेदवार खेमराज डगौराथारु ओ प्रदेशसभा क्षेत्र ‘ख’ के उम्मेदवार अमर बहादुर साउँद पत्रकार सम्मेलन करके संयुक्त रुपमे घोषणापत्र सार्वजनिक करल हुइट ।
कैलाली क्षेत्र–३ हे कृषि, पर्यटन, उद्योग वाणिज्य, शिक्षा, स्वास्थ्य, भौतिक पूर्वाधार, भाषा, कला, संस्कृति ओ विविध रुपमे विकास कैना प्रतिबद्धता तीनु जाने उम्मेदवार करले बटै । यी क्षेत्रके प्रमुख समस्याके रुपमे रहल अव्यवस्थित सहरीकरण, डुबान, लडिया कटान ओ सार्वजनिक जमिन अतिक्रमणके समस्या समाधान कैनाके साथे दीर्घकालीन योजनामार्फत विकासहे आघे बढैना प्रतिबद्धतामे उल्लेख करल बा ।
गठबन्धनके प्रतिनिधि सभा सदस्यके उम्मेदवार कृष्णकुमार चौधरी(कुन्दन), प्रदेश सभा सदस्यके उम्मेदवार खेमराज डगौरा थारु, अमरबहादुर साउँद यी क्षेत्रके डुबान समस्याके समाधान कैना, कटान रोक्न तटबन्ध कैना, सडक सञ्जालके विकास कैना, खानेपानी, शिक्षा, स्वास्थ्य ओ खेलकुद क्षेत्रमे प्रतिबद्ध हुके काम कैना घोषणा करले बटै ।
प्रत्येक पालिकामे आवश्यक उपकरण तथा उच्च जनशक्तिसहितके कम्तीमे १५ शैयाके अस्पताल निर्माण, २६ वडामे आधारभूत स्वास्थ्य सेवा ओ एम्बुलेन्स सेवा उपलब्ध करैना, जनताहे सहुलियत दरमे विद्युत् उपलब्ध करैना प्रतिबद्धताफे उम्मेदवारसे करले बटै ।
संयुक्त साझा प्रतिबद्धता पत्रमे उल्लेख करल बुँदा अपनेहुक्रे चुनाव जिटलपाछे घोषणापत्र कार्यान्वयन कैना सत्तारुढ–गठबन्धनके उम्मेदवार प्रतिबद्धता जनैलै ।
