सिकलसेल रोगबारे संवाद

पहुरा समाचारदाता
धनगढी, १३ कार्तिक । संवाद समुह धनगढीसे सिकलसेल रोगबारे थारु अगुवनसे छलफल कैले बा ।

सिकलसेल रोग उपचारके अवस्था, स्थानीय तहके भुमिका ओ पोषणके अवस्थाबारे छलफल हुइल हो । कार्यक्रममे धनगढी उपमहानगरपालिका नगर भल्मन्सा समितिके अध्यक्ष रोहितकुमार चौधरी सिकलसेल रोगबारे जनजागरण चलैना आवश्यक रहल बटैलै । उहाँ कहलै, हमरे सिकलसेल रोगबारे जनजागरण अभियान चलैना सोचमे रही मने आर्थिक कारण अभियान बह्राई नइसेक्ली ।’ सिकलसेल रोग चेकजाँच निःशुल्क हुई पर्ना उहाँ बटैलै ।

थारु अगुवा रामदास चौधरी सिकलसेल रोगवारे सकारात्मक सन्देश डेहे पर्ना बटैलै । यी रोग थारु समुदायमे केल नाही और समुदायमे डेखा परल बा,’ उहाँ कहलै, और देशके नागरिकहेफे लागल बा । उहाँहुक्रे औषधी उपचार करेबेर चोखाइल बटै । यहाँफे उ पद्धति लागु करे परल ।’

थारु अगुवा तथा बेस कैलालीके जिल्ला संयोजक लक्ष्मण चौधरी सिकलसेल रोग लागल विमारीके अवस्था कौन चरणमे बा, उहे अनुसार डवाई चलाई पर्ना सुझाव डेलै । सिकलसेल विमारीहुकन मानसिक असरफे परटी रहल ओरसे सामाजिक मनोविशर्म डेहे पर्नाफे बटैले रहिट ।

थारु कल्याण कल्याणकारिणी सभा कैलालीके कार्यवाहक सभापति माधव चौधरी सिकलसेल रोग लागल विमारीके तथ्याङक नाने पर्ना बटैले बटै । उहाँ कहलै, बहुट जैसिन स्थानीय तह सिकलसेल रोगबारे अनभिज्ञ रहल बटै । प्रदेश सरकार लगायत स्थानीय तहफे सिकलसेल रोगबारे बजेट करठ । सिकलसेल रोगके विमारी औषधी नइपैना मने बजेट फ्रिज हुइना अवस्था रहल बा ।’

अब्बे संघ ओ प्रदेशके चुनाव लग्गे रहल ओरसे उम्मेदवारके घोषणापत्रमे यी मुद्दा समावेश हुइना आवश्यक रहल उहाँ कहलै ।

नेपाल आदिबासी जनजाती महासंघ प्रदेश समन्वय समितिके अध्यक्ष दलबहादुर घर्तीमगर सिकलसेल रोग लागल व्यक्तिके शारिरीक अवस्था कम्जोर हुइना ओरसे पोषणके लाग सरकारसे ध्यान डेहे पर्ना बटैले रहिट । सरकार अब्बे सिकलसेल रोग लागलहुकन उपचार खर्च कहिके डेना रकम न्यून रहल ओरसे रकम बह्राई पर्नामे जो डेलै । कार्यक्रमके सहजीकरण संवाद समुहके कर्ण शाह करले रहिट ।