नागरिक उन्मुक्ति पार्टीके सम्पर्क कार्यालय समुदघाटन
पहुरा समाचारदाता
धनगढी, १४ कार्तिक । नागरिक उन्मुक्ति पार्टीके कैलाली जिल्ला क्षेत्र नम्बर ४ ओ ५ के सम्पर्क कार्यालयके उदघाटन हुइल बा ।
प्रतिनिधिसभा सदस्य ओ प्रदेश सभा सदस्यके लाग यिहे अगहन ४ गते हुइना चुनावप्रचारप्रसारके लाग उ पार्टीके सम्पर्क कार्यालयके उदघाटन हुइल हो । सम्पर्क कार्यालयके उदघाटन कार्यक्रम थारु कल्याणकारिणी सभाके पूर्व केन्द्रीय उपमहामन्त्री ईन्दिरा चौधरीके वडका पहुनामे हुइल रहे ।
कार्यक्रममे बोल्टी उहाँ कहली, ‘अब्बे ढकियाके बयाल बहल बा, यी चुनावमे ढकियाके लहर बा, जनता नागरिक उन्मुक्ती पार्टीहे ढेर विश्वास करले बटै, ओर पार्टीहे बयाल उडाके लैजाई ।’ कैलाली क्षेत्र नम्बर ५ ओ ४ मे थारु मतदाता ढेर रहल ओरसे अप्खीबार ढकिया ओ नल्कामे भोट डारडेना उहाँ आग्रह करली ।
सम्पर्क कार्यालयके उदघाटन कार्यक्रममे दिलबहादुर चौधरी अभिनसम टमान पार्टीन बार–बार आइल मने थारु समुदायके माग मुद्दा सम्बोधन करे नइसेकल कहटी अप्खीबार नागरिक उन्मुक्ती पार्टीके ढकीया चिन्हामे बोट डर्ना आग्रह करलै । ओस्टेक करके कैलाली क्षेत्र नम्बर ५ मे प्रतिनिधिसभा सदस्यमे उठल लक्ष्मण थारुके उम्मेदारी फिर्ता हुइलपाछे यी क्षेत्रमे नागरिक उन्मुक्ती पार्टीसे स्वतन्त्र उम्मेदवार जगदीश चौधरीहे सर्मथन करल उहाँ जनैलै ।
क्षेत्र नम्बर ५ मे प्रतिनिधि सभाके उम्मेदवारके चुनाउ चिन्हा नल्कामे छाप लगैनाफे उहाँ आग्रह करलै । कार्यक्रममे नागरिक उन्मुक्ती पार्टीके नगर प्रमुख दानबहादुर बिष्ट, प्रदेश सभा सदस्य उम्मेदवार गोठुराम चौधरी ढकीयामे बोट दर्ना सकहुनसे अनुरोध करे रहिट ।
