निष्पक्ष तथा भयरहित निर्वाचनके लाग सबके भूमिका महत्वपूर्ण
पहुरा समाचारदाता
धनगढी, १५ कात्तिक । अगामी निर्वाचनहे स्वच्छ, निष्पक्ष तथा भयरहित बनाइक लाग सबके भूमिका तथा जिम्मेवारी महत्वपूर्ण रहना एक कार्यक्रमके सहभागीहुक्रे बटैले बाटै ।
अइना अगहन ४ गते हुइना प्रतिनिधि तथा प्रदेश सभा सदस्यके निर्वाचनहे स्वच्छ, निष्पक्ष तथा भयरहित बनाइक लाग धनगढीमे मंगरके हुइल सरोकारवालाके भूमिका ओ प्रतिवद्धता विषयक अन्तरसंवाद कार्यक्रमके सहभागीहुक्रे निर्वाचन सफल बनाइक लाग सबजे आआपन भूमिका तथा पाइल जिम्मेवारी महत्वपूर्ण हुइना बटाइल हुइट ।
कार्यक्रममे नेपाल पत्रकार महासंघ कैलाली अध्यक्ष हिमाल जोशी चुनावहे निष्पक्ष एवं मर्यादित बनाइक लाग आपन पाइल जिम्मेवारी मजासे बहन करे पर्ना बटैलै । ‘आपन जिम्मेवारी मजासे बहन कैलेसे आचारसंहिता फेन उलंघन नैहुइना ओ चुनाव फेन स्वच्छ, निष्पक्ष एवं मर्यादित तरिकासे सम्पन्न हुइठ्’, उहाँ कहलै ।
नेकपा एमालेके रण बहादुर चन्द निर्वानके बेला हुइना आचारसंहिता उलंघनके घटनाके अनुगमन आयोग अपनहे करे पर्र्ना औंल्याइटी उहाँ तत्काल कारर्वाही फेन करे पर्ना जोड डेहल रहिट । यकर साथे उहाँ मिडिया तथा संचारमाध्यमहे फेन सक्कु उम्मेदवारहे प्राथामिकता डेहे पर्ना सुझाइल रहिट ।
नेपाल लोकतान्त्रिक पार्टीके कैलाली जिल्ला अध्यक्ष माधव चौधरी तडक भडक हुइना निर्वाचन निर्वाचन आयोगके आचारसंहितासे स्वच्छ, निष्पक्ष एवं शान्त बातावरणमे हुइना करल ओ उम्मेदवारके निर्वाचन खर्च फेन घटाइल ओरसे उ चीज सकरात्क रहल बटैलै । साथे उहाँ उम्मेदवारके विरुद्ध सामाजिक सञ्जालमे अइना नै मजा स्टाटस तथा अभिव्यक्तिके निर्वाचन आयोग तथा सम्बन्धित पक्षहे नियमन कैना आग्रह करल रहिट ।
मुख्य निर्वाचन अधिकृत ओमप्रसाद आर्याल निर्वाचनमे जुनसुके चीज पारदर्शिता हुइ पर्ना बटैटी उहाँ आचारसंहिताके सक्कु जाने पूर्ण पालना करे पर्नामे जोड डेहल रहिट ।
कार्यक्रममे प्रमुख जिल्ला अधिकारी किरण थापा निर्वाचनके समयमे आचारसंहिता उलंघन करुइया जुनसुके व्यक्तिहे तत्काल अनुगमन कैके कारर्वाहीके दायरामे लन्ना प्रतिवद्धता जनाइल रहिट ।
कार्यक्रममे इन्सेकके क्षेत्रिय संयोजक खडकराज जोशी स्वच्छ, निष्पक्ष ओ भयरहित निर्वाचनके लाग चुनौती विषयक कार्यपत्र प्रस्तुत कैटी सरोकारवाला निकाय सबके ध्यानाकार्षण कराइल रहिट । कार्यक्रम राष्ट्रिय मानव अधिकार आयोग प्रदेश कार्यालयके प्रमुख हरि ज्ञवालीके अध्यक्षतामे हुइल रहे ।
कार्यक्रम राष्ट्रिय मानव अधिकार आयोग प्रदेश कार्यालय धनगढी, प्रदेश निर्वाचन कार्यालय कैलाली ओ इन्सेकके संयुक्त आयोजना तथा डीसिएके सहयोगमे हुइल रहे ।
कार्यक्रममे टमान राजनीतिक दलके प्रतिनधी, संघसंस्थाके प्रतिनीधी, पत्रकार लागायतके सहभागिता रहल रहे ।
