एन.आई.सी. एशिया बैंक मार्फत वडासे सामाजिक सुरक्षा भत्ता वितरण
पहुरा समाचारदाता
हसुलिया, १७ कार्तिक । एन.आई.सी. एशिया बैंक हसुलिया शाखासे सामाजिक सुरक्षा भत्ता वितरण वडा कार्यालयसे सुरु करले बा ।
कैलारी गाउँपालिकाके समन्वयमे एन.आई.सी. एशिया बैंक, हसुलिया शाखासे वडा कार्यालयमे पुगके सामाजिक सुरक्षा भत्ता वितरण करे लागलपाछे स्थानीय खुसी हुइल हुइट । वडासे भत्ता वितरण सुरु हुइलपाछे अपनहे बहुट राहत मिलल ओ बैंकमे दिनभर लाइन बैठे पर्ना बाध्यता हटल लाभग्राहीहुक्रे बटैले बटै ।
जेष्ठ नागरिक ओ अपांगता हुइलहुकनहे बैंकमे घण्टौँ लाइन बैठे पर्ना अवस्थाके अन्त्य कैना वडासे सामाजिक सुरक्षा भत्ता वितरण सुरु करल एन.आई.सी. एशिया बैंक लि. सुदूरपश्चिम प्रदेश प्रमुख सुबास जोशी बटैलै । उहाँ जनताके सहजताके लाग वडासे सामाजिक सुरक्षा भत्ता वितरण करलपाछे नागरिकके मुहारमे खुसी डेख्के अपनहे ठप खुसी मिलल बटैलै ।
वडा नं. ६ के वडा कार्यालयसे मंंगरसे सुरु हुइल सामाजिक सुरक्षा भत्ता वितरण कार्यक्रममे जम्मा ५०० लाभग्राही लाभान्वित हुइना कैलारी गाउँपालिका–६ के वडा अध्यक्ष प्रेमबहादुर चौधरी बटैलै ।
आब उप्रान्त कैलारी गाउँपालिका–६, कैलालीके सक्कु सामाजिक सुरक्षा भत्ता वडा स्तरसे बाँटन एन.आई.सी. एशिया बैंक लि., हसुलिया शाखाके शाखा प्रमुख उमेश पाण्डे जनैलै ।
ओस्टेक करके कैलारी गाउँपालिकाके अध्यक्ष राजसमझ चौधरी सामाजिक सुरक्षा भत्ता वितरण वडा कार्यालयसे कैना सम्बन्धित बैंकहे आग्रह करल बटैलै । उहाँ कहलै, ‘जेष्ठ नागरिकहुकनहे खाता रहल बैंकहे वडास्तरमे जाके भत्ता वितरण कैना जानकारी करासेकल बटी । कोई आटेरी कैलेसे उ बैंकसे खाता हटाई सेक्जाई ।’
