किसान सहकारीके २७ औं वार्षिकोत्सव
पहुरा समाचारदाता
लम्की, १७ कार्तिक । किसान वहुउदेश्यीय सहकारी संस्थाके २७ औ वार्षिकोत्सव तथा शुभकामना आदान प्रदान कार्यक्रम विफेक रोज लम्कीमे हुइल बा ।
संस्थाके संचालक समितिके अध्यक्ष सुरेन्द्रकुमार शाहके अध्यक्षतामे हुइल कार्यक्रममे लम्की चुहानगरपालिकाके नगर प्रमुख सुशिला शाही वडका पहुना रहिट । कार्यक्रममे वोल्टी नगर प्रमुख शाही यी क्षेत्रमे झोलामे संचालन करके अनुदानके खाइक लाग केल संचालनमे रहल सहकारीहे आब नगरपालिकासे कडा नियमन कैना बटैलै ।
उहाँ किसान सहकारी संस्थासे यी क्षेत्रके आर्थिक गतिविधि चलायमान वनाइक लाग करल कार्यके सह्रर्ना करटी संस्थासे यी क्षेत्रके निम्न आयस्तर हुइल व्यक्तिके जीवनस्थर उप्पर उकास्न महत्वपुर्ण भुमिका निर्वाह करल बटैलै । अइना दिनमे नगरपालिकसे किसान सहकारीसंग सहकार्य करके टमान काम आघे वहै्रना बटैलै ।
कार्यक्रममे किसान वहुउदेश्यीय सहकारी संस्थाके संस्थापक अध्यक्ष मंगलवहादुर शाह किसान सहकारी स्थापनाके अवसरमे अपने करल संघर्षके स्मरण करटी आज यी संस्थासे करल प्रगती डेखके अपनहे बहुट खुसी लागल बटैलै । उहाँ कर्मचारीके ईमान्दारिता ओ संचालकके लगनशलिताके कारण संस्थासे सफलता प्राप्त करल स्मरण करलै ।
राष्ट्रिय सहकारी वैंकके संचालक शिवा थापा अब्बे सहकारी संचालनके प्रक्रियामे अलमल रहल ओरसे स्थानीय सरकारसे यिहीहे सही डगरमे नन्ना आवश्यक रहल बटैलै ।
किसान वहुउदेश्यीय सहकारी संस्थाके पुर्व अध्यक्ष षडान्द सापकोटा संस्थासे टमान आरोह ओ अवरोह पार करटी आज २७ औ वर्षमे प्रवेश करलमे बधाई डेटी अइना दिनमे समेत सफलताके शुभकामना व्यक्त करलै ।
संस्थाके अध्यक्ष सुरेन्द्रकुमार शाह २०८२ सालभिटर किसान सहकारीसे ३ ठो प्रदेशमे अपन सेवा विस्तार करटी ५ सय से ढेरहे रोजगारीके अवसर प्रदान संस्थाके लक्ष्य रहल स्पष्ट परलै ।
समाजसेवी कर्ण प्रसाद जैशी किसान सहकारीके स्थिर नीतिके कारण आज संस्थासे प्रगती हुइल कहटी देशमे ईमान्दारिताके साथ काम करलेसे जौनफे स्थानमे सफलता प्राप्त करे सेक्ना बटैलै ।
संचालक सरोजकुमार शाह छोट अवस्थामे सुरु करल संस्था आजके दिनमे आपुग्ना सक्कुहुनके सहयोग योगदान रहल कहटी अइना दिनमे समेत सक्कुहुनसंग सहयोगके आग्रह करलै ।
वैंकर्स क्लव लम्कीके अध्यक्ष लोकवहादुर विष्ट किसान सहकारी यी क्षेत्रके वैंक तथा वित्तीय संस्थाके लाग गर्वके विषय हुइल कहटी थप प्रगतीके कामना करलै ।
विस २०५२ साल कार्तिक १७ गते स्थापना हुइल किसान सहकारी संस्थामे हाल ३ सय कर्मचारी कार्यरत रहल बटै । संस्थामे झण्डै ७८ हजार सदस्य आवद्ध रहल बटै । संस्थासे कृषि, मार्ट, लघुवित्त ओ वंैकिङ क्षेत्रमे टमान कार्यक्रम संचालन करटी रहल बटै ।
संस्थाके शेयर पुजी ३३ करोड ६२ लाख २६ हजार रहल बा । संस्थासे हालसम २ अर्व ८७ करोड ६८ लाख ५९ हजार सात सय ९९ रुप्या रुप्या खुद मुनाफा करले बा । संस्थासे ४ अर्व १८ करोड ४२ लाख ५० हजार ५ सय १ एक रुप्या सदस्यहुकनहे लगानी करले बा ।
