मतदाता शिक्षाके लाग नमूना मतदान

पहुरा समाचारदाता
धनगढी,१८कार्तिक । अगहन ४ गते हुइना प्रतिनिधि सभा तथा प्रदेश सभा सदस्यके निर्वाचनके तयारीके क्रममे कैलालीके सुख्खडमे नमूना मतदान करल बा । उ मतदानमे शत प्रतिशत मत सदर हुइल बा ।

कैलाालीके निर्वाचन क्षेत्र नं. ३ के सुख्खड स्थित घोडाघोडी नगरपालिकाके कार्यालय परिसरमे आयोजित नमूना मतदानमे ४२ मत खसलमे सक्कु मत सदर हुइल रहे । प्रदेश निर्वाचन कार्यालय, धनगढीके पहलमे हुइल नमूना मतदानमे नगरपालिकाके प्रमुख खडक रावत ओ उपप्रमुख गुलियादेवी चौधरीलगायत गाउँघरमे खटटी रहना स्वास्थ्य स्वयम्सेविका, पालिकाका कर्मचारीलगायत सहभागी रहिट । उ अवसरमे नगर प्रमुख रावत नमूना मतदानके अभ्यासहे निरन्तरता डेहे सेक्लेसे आसन्न निर्वाचनमे बदर मत संख्या घट्न बटैलै ।

निर्वाचन कार्यालयके निमित्त प्रमुख प्रेमराज भट्ट निर्वाचनमे बदर मत घटैना ओ मतदाताहे मतदाता शिक्षा डेना उदेश्यसे नमुना मतदान करल बटैलै । उहाँ निर्वाचनमे मतदान कैना तरिका लगायतके विषयमे प्रकाश पारल रहिट ।
यी आघे कैलालीके निर्वाचन क्षेत्र नं. ४ के गोदावरी नगरपालिका क्षेत्रमेफे नमूना मतदान कार्य सम्पन्न हुइल रहे । जिल्लाके और पालिकामेफे नमूना मतदानके तयारी करल बा ।

यी बाहेक यिहे कार्तिक १८ गतेसे कैलाली जिल्लाके सक्कु निर्वाचन क्षेत्रके वडा ओ टोलमे मतदाता शिक्षा कार्यक्रम सञ्चालन कैना एकसय २६ महिला स्वयम्सेवी परिचालन करे लागल बा । स्थानीय पालिकासे निर्वाचन सम्बन्धी आवश्यक तालिम लेहल महिला स्वयंसेवीहे मतदाता शिक्षा कार्यक्रमके लाग परिचालन करे लागल हो । निर्वाचन कार्यालयसे स्थानीय तहके एकजाने अधिकृत तहके कर्मचारीहे निर्वाचन सम्पर्क व्यक्ति (अनुगमन अधिकृत)के रूपमे खटाई लागल बा ।