कैलारी युथस युनाईटेड फाइनलमे प्रवेश

पहुरा समाचारदाता
धनगढी,१८ कार्तिक । कैलारी गाउँपालिकाके कैलारी युथस युनाईटेड भेट्रान फुटवल प्रतियोगितामे फाइनल खेलमे प्रवेश करले बा ।

मनकामना युवा क्लव धनगढी उपमहानगरपालिका वडा न.१२ जुगेडासे आजोजना करल चौथा प्रदेश क्लव स्तरीय महिला÷पुरुष तथा भेट्रान फुटवल प्रतियोगिता २०७९ के यिहे शुकके रोज हुइल खेलमे अपन प्रतिस्पर्धीहे रोयल गोरखा क्लव महेन्द्रनगरहे एक गोलसे हरैटी फाइनलमे प्रवेश करल हो । कैलारी गाउँपालिकाके युथस युनाईटेड भेट्रान फुटबल प्रतियोगितामे महेन्द्रनगरहे एक गोलके विरुद्ध २ गोल मारके फाइल खेलमे प्रवेश करले बा । फाइनल खेल यिहे २० गते आयोजक टिम मनकामना युवा क्लवसे परल बा ।

यिहे कार्तिक १५ से जुगेडामे हुइटी रहल प्रतियोगिताके पहिल दिनके खेलमे अपन प्रतिस्पर्धी कञ्चनपुरके पुनर्वास भेट्रान टिमहे २ गोलके विरुद्ध ५ गोल मारके विजयी सुरुवाट करल रहे । भेट्रान पुरुष फुटवल प्रतियोगिताओर ६ टिम सहभागी रहे कलेसे भेट्रान पुरुष फुटवल प्रतियोगिताओर ४ टिम सहभागी रहल बा ।

प्रतियोगितामे भेट्रानओर विजेता हुइना टिम ७१ हजार ओ उपविजेता ३५ हजार हात परही । कलेसे उ विधा समूह भेट्रान फुटबलमे उत्कृष्ट खेलाडी, सर्वाधिक गोलकर्ता, अनुशासित टिमहे समेत पुरस्कार राशीके व्यवस्था रहल बा ।

ओस्टेक महिला÷पुरुष फुटवल प्रतियोगितामे पुरुष ओर विजेता हुइना टिम १ लाख १ हजार, उपविजेता टिम ५१ हजार १ सय, महिला समुहओर विजेता टिम ५० हजार, उपविजेता टिम ३५ हजार ट्रफी, प्रमाणपत्र ओ मेडल हात परही ।
प्रतियोगिताके उत्कृष्ट खेलाडी, सर्वाधिक गोलकर्ता, अनुशासित टिमहे समेत पुरस्कारके व्यवस्था रहल बा ।